BSU ilə Albaniya Elmlər Akademiyası arasında əməkdaşlığın genişləndirilməsi məsələləri müzakirə edilib

Bakı Slavyan Universitetinin (BSU) rektoru Anar Nağıyev Albaniya Elmlər Akademiyasının prezidenti akademik Skender Gjuneshi ilə görüşüb.

BSU-dan TƏHSİL.BİZ -ə bildirilib ki, görüş zamanı rektor Anar Nağıyev Bakı Slavyan Universiteti ilə Albaniya Elmlər Akademiyası arasında elmi-tədqiqat layihələrinin, xüsusilə Balkanşünaslıq istiqamətində əlaqələrin genişləndirilməsinin önəmini vurğulayıb. Rektor, eyni zamanda, universitetdə ənənəvi olaraq keçirilən Beynəlxalq Balkanşünaslıq Tədqiqatları konfransından bəhs edib.

Albaniya Elmlər Akademiyasının prezidenti akademik Skender Gjuneshi Bakı Slavyan Universiteti ilə elmi əməkdaşlığın genişləndirilməsində maraqlı olduqlarını bildirib və bu istiqamətdə atıla biləcək addımlar barədə fikirlərini bölüşüb.

Azərbaycanın Albaniyadakı səfiri Anar Hüseynov çıxışında Azərbaycan və Albaniya arasında mövcud dostluq münasibətlərinin əhəmiyyətindən söz açıb, bu əlaqələrin elm və təhsil sahəsində inkişaf etdirilməsinin vacibliyini vurğulayıb.

Görüşdə birgə elmi araşdırmaların aparılması, ortaq elmi layihələrin hazırlanması, elmi konfrans və simpoziumların təşkili imkanları müzakirə olunub. Eyni zamanda, tərəflərin elm və təhsil sahəsində davamlı və səmərəli əməkdaşlığın qurulması istiqamətində səylərin davam etdirilməsi, müəssisələr arasında əlaqələrin gücləndirilməsinə xüsusi diqqət ayrılmasının əhəmiyyəti qeyd olunub.