Noyabrın 14-də Mingəçevir Dövlət Universiteti (MDU) ilə Azərbaycan Respublikası Elm və Təhsil Nazirliyi Riyaziyyat və Mexanika İnstitutu arasında qarşılıqlı əməkdaşlıq haqqında Anlaşma Memorandumu imzalanıb.

tehsil.media xəbər verir ki, imzalanma mərasimində çıxış edən Riyaziyyat və Mexanika İnstitutunun baş direktoru Misir Mərdanov və MDU-nun rektoru Şahin Bayramov bildiriblər ki, Memorandum elmi potensialın gücləndirilməsi məqsədilə tərəflər arasında müvafiq istiqamətlər üzrə birgə fəaliyyətlərin reallaşdırılmasını özündə ehtiva edir. Eyni zamanda əməkdaşlığın qarşılıqlı faydalı olacağına əminlik ifadə olunub, universitet kollektivinin, tələbə və magistrantların bu əməkdaşlıqdan fəal surətdə faydalanması tövsiyə edilib.

Memorandumda müvafiq sahələr üzrə elmi-tədqiqat istiqamətlərinin birlikdə müəyyən edilməsi, elmi kadrların, gənc doktorant və tədqiqatçıların elmi biliklərinin artırılması və onlardan rasional istifadənin təşkili, regionlarında gənclər arasında riyaziyyat elminə marağın artırılması, birgə tədqiqatların aparılması və birgə nəşrlərin hazırlanması, MDU-da tədris prosesinə İnstitutun alimlərinin cəlb edilməsi məsələləri xüsusi qeyd edilib.

Eləcə də, magistrantların elmi-pedaqoji təcrübəsi üçün lazımi şəraitin yaradılması, ortaq konfransların, seminarların və “dəyirmi masa”ların keçirilməsi, ustad dərslərinin təşkili, müvafiq layihə və proqramlarda birgə iştirakın təmin edilməsi və qarşılıqlı maraq doğuran digər sahələrdə əməkdaşlığın inkişaf etdirilməsi sözügedən əməkdaşlıq sənədində əksini tapıb.

Qeyd edək ki, hazırda müasirləşməkdə olan MDU-da kadr hazırlığının və elmi fəaliyyətin məzmununun təkmilləşdirilməsi məqsədilə qabaqcıl yerli və xarici universitetlərlə, eləcə də elmi-tədqiqat müəssisələri ilə əməkdaşlığa xüsusi önəm verilir.