SOCAR-ın Bakı Ali Neft Məktəbində (BANM) ITACA (Azərbaycanda ekoloji xarakterli fövqəladə hallar üzrə 3-cü dövr yeni təhsil səviyyəsini dəstəkləyən innovativ təlim mərkəzi) layihəsinin bağlanış mərasimi keçirilib. Layihə Avropa İttifaqı tərəfindən maliyyələşdirilən “Erasmus+ KA2: Ali təhsildə potensialın qurulması proqramı” çərçivəsində idarə olunub.

tehsil.media BANM-ın yaydığı məlumata istinadən xəbər verir ki, tədbirin açılışında çıxış edən Bakı Ali Neft Məktəbinin rektoru Elmar Qasımov 2019-cu ildən başlanılan layihənin yüksək səviyyədə icra olunduğunu bildirib. Rektor vurğulayıb ki, ITACA layihəsi Azərbaycanın Avropa İttifaqı ilə həyata keçirdiyi ən mühüm təhsil layihələrindəndir və Bakı Ali Neft Məktəbi layihənin əsas tərəfdaşlarından biri, həmçinin ITACA Təlim və Tədqiqat Mərkəzinin ev sahibidir. Elmar Qasımov qeyd edib ki, ən qabaqcıl texnologiyalar ilə təmin edilmiş bu Mərkəz Azərbaycanda neft və qaz hasilatı nəticəsində mənfi təsirlərə məruz qalan torpaq və suyun təmizlənməsi, tullantıların idarə olunması məqsədilə yaradılıb və layihə çərçivəsində 10 gənc mütəxəssis “Ətraf mühitin bərpası və dayanıqlı neft-qaz istehsalı” mövzusunda 40 həftəlik təlimlərə cəlb edilib. Rektor həm yerli, həm də Avropadan olan tərəfdaş universitetlərin professor-müəllim heyəti tərəfindən keçirilən təlimlərdə tədqiqata meyilli kadrlar formalaşdığını və onların ətraf mühitin çirklənməsinin qarşısının alınması üçün faydalı tədqiqatlar həyata keçirəcəyinə, laboratoriyanın üstünlüklərindən yararlanacaqlarına əminliyini bildirib.

Ekologiya və təbii sərvətlər nazirinin müavini Rauf Hacıyev ölkədə ətraf mühit məsələlərinə xüsusi əhəmiyyət verildiyini, irimiqyaslı ekoloji layihələr həyata keçirildiyini vurğulayaraq qeyd edib ki, layihə çərçivəsində təlimlərə cəlb olunmuş tələbələrin ətraf mühit məsələlərinin həllində rol oynamaları vacibdir.

Tədbirdə çıxış edən Yunanıstanın Azərbaycandakı fövqəladə və səlahiyyətli səfiri Kristo Kapodistria Erasmus+ proqramının faydalarından bəhs edərək bu layihənin nəticələrinin uğurlu olduğuna və iştirakçılara böyük töhfə verdiyinə əminliyini ifadə edib.

Elm və Təhsil Nazirliyinin Böyük məsləhətçisi Vüsalə Qurbanova, Milli Erasmus+ ofisinin rəhbəri Pərviz Bağırov çıxışlarında layihənin ali təhsil müəssisələri üçün müsbət nəticələr verdiyini, öyrənmə və öyrətmə prosesinə dəstək olduğunu, elmi-tədqiqatlara böyük fayda gətirdiyini, yeni təcrübələr qazanıldığını bildiriblər.

Tədbirdə çıxış edən “Təmiz Şəhər”ASC-nin İdarə Heyətinin sədri Etibar Abbasov layihə tərəfdaşlarını və tədqiqatçıları təbrik edərək burada qazanılan təcrübənin gələcək fəaliyyətlərində faydalı olacağına əminliyini bildirib.

Layihə koordinatoru, professor Luca di Palma çıxışında layihə çərçivəsində həyata keçirilən işlərdən, əldə olunan nəticələrdən, gələcək imkanlardan bəhs edib. Layihənin koordinatoru vurğulayıb ki, bu layihə tərəfdaşların davamlı dəstəyi, səyi nəticəsində uğurla həyata keçirilib, Avropa İttifaqı və Azərbaycan ali təhsil müəssisələri arasında innovasiyalar və faydalı təcrübələrin mübadiləsi üzrə əməkdaşlıq baxımından faydalı olub.

Qeyd edək ki, ITACA layihəsi İtaliyanın Roma Sapienza Universitetinin koordinatorluğu və konsorsium üzvləri Danimarkanın Aalborg Universiteti, İspaniyanın Granada Universiteti, Yunanıstanın Patras Universiteti, Almaniyanın “Argus Umweltbiotechnologie GmbH" şirkəti, Azərbaycandan Bakı Ali Neft Məktəbi, Bakı Dövlət Universiteti, Azərbaycan Dövlət Memarlıq və İnşaat Universiteti, Bakı Mühəndislik Universiteti, Azecolab və “Sukanal” Elmi Tədqiqat və Layihə İnstitutu ilə birgə idarə olunub.