Şagirdlərin elektron qəbulu: Valideynlərə yaşadılan növbəti "süründürməçilik"
Birinci siniflərin elektron qəbulu prosesi elə bir qarışıq formaya salınıb ki, sanki məqsəd uşaqları məktəbə yazdırmaq yox, valideynləri bezdirməkdir. Artıq elə bir həddə çatılıb ki, ali savadı, texnoloji biliyi olmayan kimsə uşağını sistemdən qeydiyyatdan keçirə bilmir. İstənilən sənədlərin isə ucu-bucağı görünmür.
Daha sadə və rahat elektron qeydiyyat mexanizmi qurmaq bu qədərmi çətindir? Evin qeydiyyatı, kommunal çeki, ev başqasının adınadırsa qohumluq əlaqəsinin sübutu və s. kimi tələblər valideynlər üçün süni bir maneə və əsl süründürməçilik yaradır.
Xüsusilə Bakıda reallıqlar tam başqadır:
Kirayə yaşayanlar,
Tədris ili müddətində məktəbə görə evini dəyişməli olanlar,
Yaxın qohumunun evində qalanlar,
Şəxsi ev alsa da, sənədləşmə hələ bitmədiyi üçün kommunal xətləri başqasının adına olanlar...
Bu insanlar nə etməlidir? Qurumların rəsmiləri "get onu gətir, bunu düzəlt" deməklə işini bitmiş hesab edir. Amma ortada ciddi sistem nöqsanları var!
Üstəlik, yaş məsələsindəki qeyri-müəyyənlik ayrı bir dərddir. Sentyabrdan əvvəl doğulanlar və sonra doğulanlar problemi bitmir. Doğum tarixləri və illərlə bağlı tətbiq edilən konkret çərçivələr valideynləri çıxılmaz vəziyyətdə qoyur.
Bütün ölkənin təhsil sistemini idarə edənlər hər yerdə səhv axtarmaqdan gözlərinin mazol olduğunu deyirlər, amma kütləvi xidmət göstərən bir sistemi düzgün qura bilmirlər. İndi valideyn nə etməlidir?
Qohumluq əlaqəsini təsdiqləmək üçün ASAN Xidmətə gedib nə desin, nə istəsin? Kommunal başqasının adınadırsa haraya qaçsın? Sonda hər şey gəlib maddiyyata dözümlülüyə söykənir.
"Təhsil ödənişsizdir" deyilir, amma elementar qeydiyyat prosesi belə insanlara baha başa gəlir. Olmaz axı belə...
