Türk Dil Qurumunun rəhbəri Osman Mert akademik İsa Həbibbəyliyə təşəkkür məktubu ünvanlayıb
Türkiyənin Atatürk Kültür, Dil və Tarix Yüksək Qurumunun tərkibinə daxil olan Türk Dil Qurumunun rəhbəri, professor Osman Mert AMEA-nın prezidenti, akademik İsa Həbibbəyliyə təşəkkür məktubu ünvanlayıb.
AMEA-dan "tehsilmedia.info" a verilən məlumata görə, məktubda deyilir:
“Hörmətli akademik İsa Həbibbəyli,
Böyük Türk dünyasının iki görkəmli qurumu olan Milli Elmlər Akademiyası və qurumumuzla birgə təşkil etdiyimiz Türk dünyası ədəbiyyatı (şeir) mükafatları və “Uluslararası Oğuz Türkcəsi Konfransı” kimi bir tədbiri bütün Türk dünyasının öndəgələn təşkilatı olan Türk Dövlətləri Təşkilatının dəstəyi ilə müvəffəqiyyətlə həyata keçirdik.
Birgə əldə etdiyimiz bu uğurların 1926-cı ildə I Bakı Türkoloji Qurultayının keçirildiyi Milli Elmlər Akademiyasında baş tutması, can Azərbaycanın və bütün Türk dünyasının ortaq sevinci, Qarabağda Azərbaycanın suverenliyinin tam bərpa edilməsi günləri ilə üst-üstə düşməsi, Azərbaycan Respublikasının Ulu Öndəri Heydər Əliyevin 100-cü ildönümünə təsadüf etməsi, eyni zamanda Dil Bayramının 91-ci ildönümü günündə və Türkiyə Cümhuriyyətinin quruluşunun 100-cü ilində həyata keçirilmiş olması təsadüflərlə izah edilə bilməyən bir çox müqəddəs sirləri ehtiva edir. Şübhəsiz ki, eyni gündə bir araya gələn bu xoş görüşlərin arxasında türk millətinin birliyinə, əmin-amanlığına olan səmimi inancımız və bu yolda göstərdiyimiz səylər dayanır.
Birgə həyata keçirdiyimiz bu fəaliyyətlərin ilkin mərhələsindən son mərhələsinə kimi həm dövlət xadimi, həm də akademik nöqteyi-nəzərdən yüksək marağınızı və dəstəyinizi gördük. Qurumumuz türkcənin yayıldığı bütün sahələrdə günün şərtlərini, dövlətimizin və Türk dünyasının ehtiyaclarını nəzərə alaraq elmi və mədəni araşdırmalar apararkən, Akademiyanız hər zaman bizim tərkib hissəmiz olacaq və birliyimiz daha da möhkəmlənəcəkdir. Bu münasibətlə can Azərbaycana gəlişimizdən gedənə qədər böyük maraq və səmimiyyətlə qarşılaşdığımız Sizə və həmkarlarınıza öz sevgi və hörmətimi bildirmək istəyirəm.
Professor Osman Mert,
Türkiyənin Atatürk Kültür, Dil və Tarix Yüksək Qurumunun tərkibinə daxil olan Türk Dil Qurumunun rəhbəri”
Qeyd edək ki, cari ilin sentyabrın 26-da AMEA-nın Rəyasət Heyətinin binasında Azərbaycan Milli Elmlər Akademiyasının və Türkiyənin Atatürk Kültür, Dil və Tarix Yüksək Qurumunun tərkibinə daxil olan Türk Dil Qurumunun təşkilatçılığı ilə Ümummilli Lider Heydər Əliyevin və Türkiyə Cümhuriyyətinin 100 illiyinə həsr edilmiş “Uluslararası Oğuz Türkcəsi Konfransı” keçirilib.
