Abituriyentlər tələbə adını qazandıqdan sonra iş imkanları barədə düşünməyə başlayırlar. Əyani və ya qiyabi oxumağından asılı olmayaraq tələbələr elə tələbəlik illərində öz ixtisası üzrə iş axtarmağa başlayır, bu mümkün olmadıqda digər işlərdə özlərini sınayırlar.

"tehsil.media"ın məlumatına görə, valideylər isə əksinə tələbənin işləməsi yerinə oxumağa köklənməsinə üstünlük verirlər.

Təhsil eksperti Elçin Əfəndinin sözlərinə görə, tələbələrin əmək fəaliyyəti ilə məşğul olması onların təhsil keyfiyyətini aşağı salır. Ona görə yaxşı olardı ki, ali təhsil müəssisələrində dövlət sifarişli yerlərin sayı artırılsın.
Deputat Razi Nurullayev isə bildirir ki, tələbələrin işləməsi yaxşı haldır. Amma gərək onların təhsil və iş saatı toquşmasın.
Məlumdur ki, tələbələrin bir çoxu bölgələrdən gəlir. Əksəriyyəti də, maddi problemi həll etmək üçün işləməyə məcburdurlar. Razi Nurullayevin sözlərinə görə, 3-4 saat üçün də tələbələri işə götürmək istəmirlər. İnsan Resursları Assosasiyasının İdarə Heyətinin üzvü İlkin Məcidov bildirib ki, tələbələr ən çox yarımştat işlərlə maraqlanırlar.
Əmək qanunvericiliyinə görə, ali təhsil müəsissələrinin bakalavr və magistratura səviyyəsində oxuyan tələbələr işləyə bilərmi?
Hüquqşünas Şamil Paşayev bildirib ki, əyani olaraq bakalavr və magistratura səviyyəsində oxuyan tələbələrin işləmək və əmək müqaviləsi bağlamaq hüququ var.
Azərbaycan Respublikası Konstitusiyasının və Əmək məcəlləsinin qanunlarına əsasən 15 yaşdan yuxarı şəxslərin işləmək hüququ var.

TƏHSİL MEDİA