Müəllimləri təhdid edirlər? Bu zorakılığın səbəbi...

Dərs ilinin son aylarıdır, amma müəllimlər üçün bu, sadəcə iş yükü deyil — açıq-aşkar təhdid dövrünə çevrilib.

Tehsilmedia.az bildirir ki, direktorlar “monitorinq zəif olsa, işdən çıxarılacaqsınız” deyərək müəllimləri qorxu altında saxlayır. Daha dəhşətlisi isə odur ki, siniflərin pul qarşılığında (1000 azn) “paylanması” kimi iddialar səslənir. Bu artıq sadəcə problem deyil — bu, açıq ədalətsizlik və sistemli təzyiqdir.

Müəllim nə etsin? Monitorinqlərə görə şagirdlərə əlavə vəsaitlər məcburi şəkildə aldırıldı, əlavə dərslər keçir, əlavə materiallar tətbiq edir, vaxtından artıq işləyir. Cədvələ belə monitorinq üçün əlavə dərs saatı salınıb ki, mütləq yüksək nəticə olmalıdır. Müəllim bəs daha nə etsin? Saxta nəticələr versin? Statistikaya görə “uğurlu” görünsün deyə həqiqəti gizlətsin?

ETN Regional Təhsil İdarələrini sıxışdırır, onlar öz növbəsində direktorları, onlar da öz növbəsində müəllimləri. Nəticədə yenə də ən ağır yük müəllimə düşür. Bacarsalar belə kimsə dəyərləndirən deyil. Bəs bu zorakılığa niyə hər kəs susur?
Zorla uğur əldə etmək üçün bu qədər edilənlər azmış kimi, indi artıq təhdid, şantajlar başlayıb.

Bu, təhsil deyil. Bu, qorxu üzərində qurulan bir
sistemdir. Bu, müəllimə qarşı zorakılıqdır.
Bu biabırçılığa son verilməlidir. Təhsil saxta rəqəmlərlə deyil, dürüstlük və hörmətlə inkişaf edir!