“Yaxşı olardı ki, məzunlar bu qədər sıxışdırılmazdı” - Təhsil ekspertindən ETİRAZ
"Adından bəlli olduğu kimi, bu bir buraxılış imtahanıdır. Hələ bu məzunları qarşıda ali təhsil müəssisələrinə qəbul gözləyir. Blok imtahanı dediyimiz çox ciddi bir mərhələ gəlir. Yəni yaxşı olardı ki, bu mərhələdə məzunlar bu qədər sıxışdırılmazdı".
Bunu Redaktor.az-a təhsil eksperti Məzahir Məmmədli ötən gün keçirilən 11 illik buraxılış imtahanından narazılıqlara münasibət bildirərkən dedi.
"Ayın 15-də imtahan verəcək məzunlar stresə, gərginliyə girirlər ki, deyirlər imtahan çətin olub. Bəlkə də heç bu gərginlik üçün hər hansı bir əsas yoxdur. Onun elə ümumtəhsil məktəbində qəbul etdiyi proqram ona yetərli olacaq ki, burada müvəffəq nəticə əldə eləsin. Sadəcə olaraq bu son bir neçə ildə artıq bir qədər də bu fon ağırlaşıb. Abituriyentlərin, məzunların üzərinə sanki valideynlər tərəfindən, cəmiyyət, ictimaiyyət tərəfindən böyük bir yük qoyulub. Çünki bütün şəxslər artıq bunu müzakirə etməyə başlayıblar", - deyə o bildirdi.
Müsahibimiz vurğuladı ki, Azərbaycan təhsil sistemi çox imtahanlı, çox sınaqlıdır:
"Dünən keçirilən buraxılış imtahanından sonra müşahidə etdiyim bir mənzərə var. Burada kimlər zəif nəticə göstəriblərsə, bunlar birmənalı şəkildə sualların ağır olduğunu qeyd edirlər. Başqa bir tərəfdən böyük pullar xərcləmiş valideynlər repetitor müəllimləri, kursları sıxışdırmağa başlayıblar. Onlar da öz növbəsində Dövlət İmtahan Mərkəzinə qarşı ittihamları səsləndirməyə başlayıblar ki, suallar çox ağır idi, çox sərt idi, bu buraxılış imtahanı üçün çox ağır suallardır. Bu gün artıq bizim cəmiyyət olaraq kimin haqlı, kimin haqsız olduğunu aşkarlayıb çıxartmaq imkanlarımız məhduddur. Çünki biz DİM ilə, repetitorlarla, kurs rəhbərləri ilə bağlı zamanla fikirlər səsləndirmişik. Bugünkü mənzərənin qarşısını almaq üçün bir qədər qəbul qaydalarında yenilik eləsək, sadələşdirsək, bu qədər səs-küyə, narazılığa da ehtiyac qalmayacaq".
