"Bəzi müəllimlər bu prosesi ağır keçirəcək" - Əməkdar müəllim
Xəbər verdiyimiz kimi, Prezident İlham Əliyevin təsdiqlədiyi Əmək Məcəlləsində və "Təhsil haqqında" Qanunda dəyişiklik edilməsi barədə qanuna əsasən, uşaq musiqi, incəsənət, rəssamlıq məktəblərində işləyən təhsilverənlərin nəzəri və praktiki biliklərinin attestasiya yolu ilə deyil, xüsusi qaydalar üzrə sertifikasiya əsasında qiymətləndirilməsi aparılacaq.
Əməkdar müəllim Sona Əliyeva Redaktor.az-a açıqlamasında bildirdi ki, musiqi və incəsənət məktəblərində sertifikasiyanın tətbiqi əslində gözlənilən bir qərar idi. Onun sözlərinə görə, uzun illər bu sahə toxunulmaz, görünməz yer kimi qalmışdı:
"Odur ki, gözlə görünən imkişaf da yox idi. Bu gün bir çox məktəbdə metodika köhnədir, müəllimlərin peşəkar inkişafı sistemli şəkildə qurulmayıb və ən əsası isə nəticə ölçülmür. Dövlət isə artıq "diplomu varsa, işləsin” yanaşmasından uzaqlaşır və "nəticə verirmi" sualını önə çıxarır. Hər sahədə olduğu kimi burada da, sertifikasiya müəllimlərin bilik və bacarıqlarını qiymətləndirmək üçündür. Bu doğrudur. Amma məsələ təkcə bununla bitmir. Düşünürəm artıq burada fərqli məqsəd var, sistemi daha effektiv və nəticəyönümlü hala gətirmək".
Müsahibimiz əlavə etdi ki, bu qərar öz üzərində işləyən, metodikasını yeniləyən, şagirdlə real nəticə göstərən müəllimlər üçün böyük şansdır:
"İllərlə sadəcə “staj” hesabına sistemdə qalanlar üçün isə bu proses asan olmayacaq. Amma bu, istənilən islahatın təbii nəticəsidir. Bəziləri deyir ki, sənəti imtahanla ölçmək olmaz. Bu fikir kökündən reallığı əks etdirmir. Sertifikasiya sənətkarı deyil, müəllimi qiymətləndirir. Müəllimin funksiyası isə ilham yaratmaqdan əvvəl bilik ötürməkdir. Metodika, nəzəri hazırlıq və pedaqoji bacarıq ölçülə bilən göstəricilərdir. Təbii ki, burada risklər də var. Bu prosesin uğuru birbaşa tətbiq mexanizmlərindən asılıdır. Əgər meyarlar formal xarakter daşıyarsa və ya süni şəkildə yumşaldılarsa, sertifikasiya sadəcə statistik prosedura çevriləcək.
Digər tərəfdən, bu mexanizm cəza aləti kimi deyil, inkişaf aləti kimi də qurulmalıdır. Paralel olaraq müəllimlərin hazırlanması, təlim proqramları və metodiki dəstək gücləndirilməlidir. Əlbəttə ki, ilk mərhələdə müəyyən çətinliklər olacaq. Bəzi müəllimlər bu prosesi ağır keçirəcək. Amma əgər sistem prinsipial şəkildə tətbiq olunarsa, yaxın bir neçə il ərzində incəsənət təhsilində real keyfiyyət dəyişikliyi görmək mümkün olacaq. Sertifikasiya incəsənət təhsilində illərlə yığılan struktur problemlərə gecikmiş cavabdır. Dövlət artıq kəmiyyət deyil, keyfiyyət üzərindən maliyyələşdirmə modelinə keçidin siqnalını verir", - deyə Əməkdar müəllim vurğuladı.
