AMEA-nın Qarabağ Elmi Bölməsi yaradılacaq

AMEA-nın Qarabağ Elmi Bölməsi və və Quba Regional Elmi Mərkəzi yaradılacaq.

AzEdu.az xəbər verir ki, AMEA-nın 2025-ci il üzrə Ümumi yığıncağında akademiyanın Qarabağ Elmi Bölməsinin yaradılması və Quba Regional Elmi Mərkəzinin fəaliyyətinin təşkili üzrə tədbirlərin davam etdirilməsi qərara alınıb.

Qərara əsasən, AMEA-nın 2025-2030-cu illər İnkişaf Konsepsiyası və Yol Xəritəsinin icrası təmin ediləcək, icraya nəzarət gücləndiriləcək. Milli tarix, Azərbaycan dili, texnoloji inkişaf, süni intellekt, rəqəmsallaşma, kibertəhlükəsizlik, müdafiə sənayesi və geoloji kəşfiyyat prioritetləri üzrə tədbirlər davam etdiriləcək. Elmin nəticəyönümlü idarə olunması üçün məqsədli elmi proqramların formalaşdırılması və tətbiqi gücləndiriləcək. Humanitar və ictimai elmlər sahəsində milli tarix, arxiv sənədləri, xəritə və toponimlərin araşdırılması davam etdiriləcək. Azərbaycan dilinin qorunması, ədəbi normaların monitorinqi və dil texnologiyaları üzrə layihələr dəstəklənəcək. Beynəlxalq elmi əlaqələr, konfrans və layihələr genişləndiriləcək, AMEA jurnallarının beynəlxalq indekslənməsi dəstəklənəcək. İnsan resursları və elmmetrik məlumatlar üzrə monitorinq, doktorant və dissertantların hazırlığı, gənc alimlərin stimullaşdırılması və “Gənclər Akademiyası”nın fəaliyyəti gücləndiriləcək.