İki fəndən sertifikasiyadan keçəcək tarix müəllimləri: Onlara güzəşt lazımdırmı?
Bildiyiniz kimi, bu il tarix fənn müəllimləri ilk dəfə sertifikasiya prosesinə cəlb olunacaqlar. Lakin bu prosesdə diqqət çəkən mühüm bir məqam var: tarix müəllimləri yalnız bir fənn üzrə deyil, faktiki olaraq iki fənn - Azərbaycan tarixi və ümumi tarix üzrə imtahan verəcəklər. Bu isə digər fənn müəllimləri üçün tətbiq olunan imtahan sistemi ilə eyni deyil.
Bu baxımdan sual yaranır: mövcud yanaşma tarix müəllimləri üçün əlavə çətinlik yarada bilərmi?
AzEdu.az-a mövzu ilə bağlı Elm və Təhsil Nazirliyi yanında İctimai Şuranın katibi ingilis dili müəllimi Günay Əkbərova danışıb.
O, qeyd edib ki, hər iki istiqamətin imtahanda yer alması məntiqi və əsaslandırılmışdır:
"Tarix fənninin sertifikasiya modelində Azərbaycan tarixi və ümumi tarixin birlikdə qiymətləndirilməsi təsadüfi yanaşma deyil. Bu qərar tarix fənninin mahiyyətindən irəli gəlir. Tarix ayrı-ayrı faktların toplusu deyil, vahid zaman xətti və səbəb-nəticə əlaqələri üzərində qurulan elmi sahədir. Azərbaycan tarixini ümumi tarixdən kənarda, izolyasiya olunmuş şəkildə dəyərləndirmək fənnin elmi məntiqinə uyğun olmazdı.
Sertifikasiya prosesi konkret sinifdə keçilən mövzuların yoxlanılması deyil, müəllimin tarixi düşüncə bacarığını, metodoloji hazırlığını və fənn üzrə ümumi səriştəsini qiymətləndirməyə xidmət edir. Tarix müəllimi həm milli, həm də dünya tarixi kontekstində hadisələri izah edə bilməli, paralellər qurmalı və şagirdlərdə bütöv tarixi baxış formalaşdırmalıdır. Bu baxımdan hər iki istiqamətin imtahanda yer alması məntiqi və əsaslandırılmışdır".
Digər fənnlərlə müqayisədə fərqli yanaşmanın tətbiqi də fənnin spesifikliyi ilə bağlıdı:
"Tarix fənni struktur etibarilə bir neçə müstəqil sahədən deyil, bir-birini tamamlayan məzmun bloklarından ibarətdir. Buna görə də biologiya, kimya və ya fizika fənləri ilə birbaşa paralel aparmaq düzgün olmazdı.
İmtahan müddəti və sual bölgüsünə gəldikdə isə əsas prinsip tarazlıq və adekvatlıqdır. Qiymətləndirmə modeli elə qurulmalıdır ki, hər iki istiqamət üzrə müəllimin bilik və bacarıqları eyni meyarlarla ölçülsün, faktoloji yüklənmə yox, anlayışların mənimsənilməsi və analitik düşüncə əsas götürülsün.
Düşünürəm ki, bu yanaşmanın məqsədi tarix müəllimlərinə əlavə yük yaratmaq deyil, fənn üzrə vahid peşəkar standartın formalaşdırılmasıdır. Sertifikasiya sistemi tarix müəlliminin peşəkar portretini bütöv şəkildə qiymətləndirməyi hədəfləyir və bu çərçivədə seçilən model əsaslandırılmış, ardıcıl və fənnin mahiyyətinə uyğundur".
