Azərbaycan Keniyadakı məktəbə humanitar yardım göndərib
Azərbaycan və Keniya arasında dinamik inkişaf edən münasibətlərin tərkib hissəsi olaraq Xarici İşlər Nazirliyinin nəzdində fəaliyyət göstərən Azərbaycan Respublikasının Beynəlxalq İnkişafa Yardım Agentliyi (AİDA) Keniyanın Vihiqa əyalətində yerləşən Müqəddəs Ursula adına Çamakanqa xüsusi məktəbinə növbəti dəfə 20 min ABŞ dolları məbləğində humanitar yardım göstərib.
AzEdu.az xəbər verir ki, Azərbaycanın Keniyadakı Səfirliyindən verilən məlumata əsasən, bu yardım AİDA-nın 2025-ci ildəki ilk maliyyə töhfəsinin davamıdır və əqli qüsurlu uşaqların təhsil aldığı məktəbin sinif otaqlarının və yataqxanaların təmiri, içməli su təminatı, təlim-tədris materiallarının və zəruri mebellərin alınması da daxil olmaqla bir sıra təcili institusional ehtiyaclarını qarşılayacaq.
Yanvarın 26-da AİDA-nın humanitar yardımının təqdim edilməsi münasibəti ilə məktəbdə mərasim keçirilib. Mərasimdə Vihiqa əyaləti qubernatorunun müavini Uilberfors Kitiezo, Azərbaycanın Keniyadakı səfiri Sultan Hacıyev, Vihiqa əyalətinin komissarı Florens Sitava, Keniya Təhsil Nazirliyinin rəsmiləri və ictimaiyyət nümayəndələri iştirak ediblər. Səfir Sultan Hacıyev AİDA-nın maliyyə yardımı əsasında məktəbdə həyata keçirilmiş işlərlə və alınmış maddi-texniki vəsaitlərlə tanış edilib.
Səfir Sultan Hacıyev inklüziv təhsilin davamlı inkişafın və bərabərliyin əsas komponenti kimi əhəmiyyətini vurğulayıb. Azərbaycanın Heydər Əliyev Fondu və AİDA vasitəsi ilə Keniyada və digər Afrika ölkələrində təhsil, gənclərin gücləndirilməsi, mədəniyyət və səhiyyə sahələrində humanitar yardım fəaliyyətindən danışıb.
Vihiqa əyalətinin qubernatorunun müavini Uilberfors Kitiezo AİDA-nın Keniyadakı humanitar fəaliyyətini Azərbaycanın dayanıqlı inkişafa və Cənub-Cənub əməkdaşlığına sadiqliyinin nümayişi olaraq qiymətləndirib və yardıma görə Azərbaycan Hökumətinə təşəkkür edib. "Heydər Əliyev adına Beynəlxalq Təhsil Qrantı” proqramı çərçivəsində keniyalı gənclərə verilən təhsil təqaüdlərini qeyd edərək, bu təqaüdün iki ölkənin xalqları arasında dostluq və tərəfdaşlıq bağlarının güclənməsinə mühüm töhfə olduğunu vurğulayıb.
Direktor Benina Vafula məktəbin müraciətini nəzərə alıb AİDA tərəfindən yenidən maddi yardım göndərilməsində göstərdiyi dəstəyə görə Azərbaycanın Keniyadakı səfirliyinə minnətdarlığını bildirib. O, bu xeyirxah aksiyanın Vihiqa əyalətində Azərbaycan haqqında unudulmaz təəssüratların yaranmasına böyük töhfə olacağını qeyd edib
