Azərbaycan elmi beynəlxalq nəşrlərdə rekord göstəriciyə çatıb
2025-ci ildə Azərbaycan alimlərinin nüfuzlu beynəlxalq elmi jurnallarda dərc olunan məqalələrinin sayı rekord səviyyəyə çatıb. Bu göstəricilər ölkədə elmi fəaliyyətin keyfiyyətinin yüksəldiyini və Azərbaycan elminin beynəlxalq elmi mühitdə mövqeyinin möhkəmləndiyini göstərir.
AzEdu.az xəbər verir ki, Scopus bazasında indekslənmiş jurnallarda Azərbaycan alimləri tərəfindən dərc edilən məqalələrin sayı 2023-cü ildə 2 924, 2024-cü ildə 4 684 olduğu halda, 2025-ci ildə bu rəqəm 6 113-ə yüksəlib. Bu, 2024-cü illə müqayisədə təxminən 30%, 2023-cü ilə nisbətən isə 109% artım deməkdir.
Web of Science bazasında indekslənmiş jurnallarda dərc olunan məqalələrin sayı da ciddi artım nümayiş etdirib. Belə ki, 2023-cü ildə 1 668 olan göstərici 2024-cü ildə 3 476-ya, 2025-ci ildə isə 4 259-a çatıb. Bu, 2023-cü illə müqayisədə təxminən 2,6 dəfə (155%) artım deməkdir.
Bununla yanaşı, ötən il Q1 indeksli jurnallarda 2 970-dən çox, Q2 indeksli jurnallarda isə 1 250-dən çox məqalə dərc olunub. Q1 jurnallarda dərc olunan məqalələrin sayı Q2 jurnallarla müqayisədə təxminən 2,4 dəfə çox olub. Qeyd edək ki, 2024-cü ildə bu göstərici 2,14 dəfə idi.
İstinad göstəricilərində də müsbət dinamika müşahidə olunur. Sahə üzrə orta istinad göstəricisi 2024-cü ildə 1,55 olduğu halda, 2025-ci ildə 1,70-ə yüksəlib. Eyni zamanda, dünya üzrə ən çox istinad alan elmi işlərin (Top 10%) yerli nəşrlərdə xüsusi çəkisi 1,8% artaraq 10,5%-ə çatıb.
Elmi fəaliyyətin daha da təşviqi məqsədilə Azərbaycan alimləri üçün mühüm imkan yaradılıb. Belə ki, Böyük Britaniyanın Kembric Universitetinə məxsus “Cambridge University Press” platformasında növbəti 3 il ərzində 422 hibrid və “gold” Open Access jurnalda limitsiz sayda ödənişsiz məqalə dərc etmək imkanı təqdim olunub.
