Qusar rayonunun Piral kənd tam orta məktəbi ilə bağlı "DogruXeber.az" redaksiyasına daxil olan çoxsaylı məlumatlar narahatedici faktları üzə çıxarmışdı. Belə ki, redaksiyamıza təqdim edilən məlumatlarda məktəbin direktoru Ağamət Ağamətovun rəhbərlik etdiyi təhsil ocağını ailəvi maraqlara xidmət edən bir struktur kimi istifadə etdiyi bildirilirdi. Məlumatlar əsasında media haqqında qanunun tələblərinə uyğun olaraq "DogruXeber.az" saytında məsələ ictimailəşdirilmiş və bu özbaşınalıqlara diqqət çəkilmişdi.

Lakin görünür ki, ictimaiyyətə məlumat vermək hüququndan istifadə edən media orqanının bu addımı bəzi şəxsləri ciddi narahat edib. Belə ki, 17 iyul 2025-ci il tarixində direktorun qardaşı Stanislav Ağamətov "DogruXeber.az" saytının rəhbəri Kamal Əsgərova zəng edərək onu açıq şəkildə təhdid etmiş, "bu işi belə qoymayacam" deyərək mətbuat nümayəndəsinə qarşı təzyiq göstərmişdir.

Bu cür təhdidlər bir tərəfdən jurnalistin peşə fəaliyyətinə birbaşa təzyiq kimi qiymətləndirilməli, digər tərəfdən isə Kamal Əsgərovun fiziki təhlükəsizliyi məsələsini gündəmə gətirir. Təəssüf doğuran məqam ondan ibarətdir ki, ölkədə hüquqi dövlət və azad media prinsipləri bərqərar olmasına baxmayaraq, bəzi şəxslər hələ də jurnalistlərin fəaliyyəti ilə barışa bilmir və onları hədəf almağa çalışırlar.

P.S: Qeyd edək ki, məsələ barəsində tərəfimizdən hüquq-mühafizə orqanlarına rəsmi sorğu göndərilib.

Hesab edirik ki, hüquq-mühafizə orqanlarının bununla bağlı dərhal tədbir görməsi və jurnalist təhlükəsizliyinin təmin olunması zəruridir. Bu cür halların cəzasız qalması azad medianın fəaliyyətinə kölgə sala bilər.