İtaliyada yaşayan tanınmış Azərbaycan xoreoqrafi bir qrup yetirməsi ilə görüşüb

Milan əyalətinin Busto-Qarolfo şəhərində yeləşən “Orizondansa” məktəbində İtaliyada yaşayan tanınmış xoreoqraf, Milan Konservatoriyasının professoru, Azərbaycanın əməkdar artisti Mais Nuriyevlə görüş keçirilib.

tehsilmedia.info xəbər verir ki, görüşdə məktəbin müəllimləri və soydaşımızın keçmiş tələbələri iştirak ediblər.

Mais Nuriyev ölkəmizin tarixi qələbəsi barədə sevincini yetirmələri ilə bölüşüb, Azərbaycan həqiqətlərini dolğun şəkildə tələbələrə və müəllimlərə çatdırıb.

Qeyd edək ki, İtaliyanın müxtəlif rəqs akademiyalarında və tədris müəssisələrində dərs deyən soydaşımız tələbələrinin sevimli müəlliminə çevrilib. Yetirmələri soydaşımızdan təkcə xoreoqrafiyanın sirlərini öyrənmir, həm də qısa müddət ərzində Azərbaycanın dostlarına çevrilirlər.

Xoreoqraf bildirib ki, İtaliyanın Təhsil Nazirliyi ilə müqaviləsi üzrə ibtidai və orta məktəblərdə rəqs kursları layihəsində də fəal iştirak edir. 3-4 ay ərzində həyata keçirilən kurslarda milli rəqslərimizin tədrisi ilə yanaşı, italiyalı şagirdlərə Azərbaycan tarixi və mədəniyyəti barədə ətraflı məlumat verir. Yekun konsertdə səhnəyə çıxan şagirdlər təkcə “Yallı” milli rəqsimizi nümayiş etdirmir, həm də rəqs edərkən “Azərbaycan” sözünü yüksəkdən səsləndirirlər.

Qeyd edək ki, Mais Nuriyev İtaliyada fəaliyyət göstərən “Azəri” Azərbaycan Mədəniyyət Assosiasiyasinin sədridir.