Gürcüstanın Qardabani rayonunda fəaliyyət göstərən Təhsil və İnteqrasiya Mərkəzində ölkəmizin Zəfər Gününə həsr olunmuş tədbir keçirilib.

Bu barədə "tehsil.media"a Diasporla İş üzrə Dövlət Komitəsindən məlumat verilib.

Azərbaycanın və Gürcüstanın Dövlət himnlərinin səsləndirilməsi ilə başlayan tədbirdə ölkəmizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Tədbirdə çıxış edən mərkəzin təsisçisi Raul Əliyev, mərkəzin direktoru Çiçək Huseynova, Azərbaycan dili müəllimi Sevda Şahverdiyeva və fəxri qonaq Əvəzxan İsayev böyük tarixi gün münasibətilə soydaşlarımızı təbrik ediblər. Zəfər Gününün və Azərbaycan Prezidenti, Müzəffər Ali Baş Komandan İlham Əliyevin Xankəndinin mərkəzi meydanında keçirilmiş hərbi paradı qəbul etməsinin Azərbaycanın dövlətçilik tarixinə qızıl hərflərlə həkk olunduğu diqqətə çatdırılıb, Gürcüstan dövlətinin hər zaman Azərbaycanın ərazi bütövlüyünü dəstəklədiyi vurğulanıb.

Bədii hissədə mərkəzin şagirdlərinin ifasında Azərbaycana həsr olunmuş şeirlər səsləndirilib.