Şərqşünas alim Suriya yazıçısının əsərini Azərbaycan ədəbiyyatı kontekstində təhlil edib

AMEA-nın akademik Ziya Bünyadov adına Şərqşünaslıq İnstitutunun əməkdaşı Türkan Mehdiyevanın “Görkəmli Suriya yazıçısı Ğadət əs-Səmman yaradıcılığının Azərbaycan ədəbiyyatı kontekstində təhlili” adlı məqaləsi Ukraynada “Scientific notes of V.I.Vernadsky Taurida National University” jurnalının filologiya və jurnalistika seriyasında ingilis dilində dərc olunub.

Bu barədə "tehsilmedia.info" a institutdan məlumat verilib.

Bildirilib ki, məqalədə Ğadət əs-Səmmanın Azərbaycan ədəbiyyatı ilə birbaşa və dolayısı ilə əlaqələrindən söz açılır. İlk növbədə, yazıçının əsərlərinin dilimizə çevrilməsi və tədqiqi məsələləri ön plana çıxarılır.

Məqalədə Ğadət əs-Səmmanın əsərlərinin Azərbaycan dilinə çevrilməsi və tədqiqinin xüsusi əhəmiyyətə malik olduğu qeyd edilir. Eyni zamanda, Ğadət əs-Səmmanın yaradıcılığı ilə Azərbaycan ədəbiyyatı nümunələri arasında paralellik aparılır. Müəllif, həmçinin əruz vəzninin Azərbaycan poeziyasında da işlək olmasının bu yaxınlığın təməllərindən sayıla bilməsinə toxunur. Böyük Azərbaycan şairi İmadəddin Nəsiminin üç dildə yazması, Məhəmməd Füzulinin üç dildə divan yaratması ərəb-Azərbaycan ədəbi əlaqələrinin inkişafı üçün etibarlı zəmin yaratmışdır. Vaxtilə Azərbaycanda şərqşünaslığın inkişafında çox mühüm işlərin aparılması, əsasən ərəb filologiyası məsələlərinin bu kontekstdə öyrənilməsi mühüm əhəmiyyətə malik hadisədir. Məqalədə bu kimi mətləblərə işıq tutulur, yazıçının əsərləri bizim ədəbiyyatın kontekstində qarşılıqlı surətdə araşdırılır.