Elm və təhsil nazirinin müavini Britaniya Şurasının Avropa regionu üzrə rəhbəri ilə görüşüb - FOTO
Oktyabrın 26-da elm və təhsil nazirinin müavini Həsən Həsənli Britaniya Şurasının Avropa regionu üzrə rəhbəri Coanna Börk ilə görüşüb.
tehsilmedia.info xəbər verir ki, görüşdə təhsil sahəsində ikitərəfli əlaqələrin cari vəziyyətindən məmnunluq ifadə edilib və gələcək əməkdaşlıq perspektivləri müzakirə olunub.
Tərəflər Britaniya Şurasının dəstəyi ilə ölkəmizdə bir sıra layihələrin uğurla icra olunduğunu qeyd ediblər. Bildirilib ki, ümumi, peşə və ali təhsil sahələrini əhatə edən layihələr çərçivəsində müəllimlərin bilik və bacarıqlarının inkişafına, ingilis dilinin tədrisi keyfiyyətinin artırılmasına müsbət töhfə verilib, həmçinin Azərbaycan Respublikası və Böyük Britaniya ali təhsil müəssisələri arasında əməkdaşlığın qurulmasına, gənclər arasında tətbiqi incəsənət və sahibkarlıq bacarıqlarının inkişafına dəstək göstərilib.
Görüşün sonunda Elm və Təhsil Nazirliyi və Britaniya Şurasının Azərbaycandakı nümayəndəliyi arasında əməkdaşlığa dair Niyyət Məktubu və 2023–2024-cü tədris ili üzrə Fəaliyyət Planının imzalanması mərasimi keçirilib.
