AzMİU ilə İTU arasında magistr və doktorant hazırlığı üzrə ikili diplom müqaviləsi imzalana bilər - FOTO
Türkiyənin İstanbul Texniki Universitetinin (İTU) prorektoru professor Adil Dəniz, İnşaat mühəndisliyi kafedrasının müəllimi professor Kadir Gülər və Xarici əlaqələr ofisi koordinatorunun köməkçisi Fatih Ortakçı Azərbaycan Memarlıq və İnşaat Universitetində (AzMİU) olublar.
AzMİU-dan "tehsilmedia.info"a bildirilib ki, rektor Gülçöhrə Məmmədova qonaqlarla görüşdə iki universitet arasındakı ikili diplom müqaviləsinə, səmərəli əməkdaşlığa diqqət çəkərək əlaqələrin daha da inkişaf etdirilməsinin, şaxələndirilməsinin, həmçinin yeni əməkdaşlıq formatlarının yaradılmasının vacibliyini vurğulayıb. Rektor bildirib ki, elm, beynəlxalq əlaqələr, beynəlxalq qrant layihələri, tələbə-müəllim mübadiləsi sahəsində əlverişli əməkdaşlıq imkanları var və bu imkanlardan qarşılıqlı faydalanmaq lazımdır.
Prorektor Adil Dəniz bildirib ki, İTU AzMİU ilə əməkdaşlığı daha da gücləndirməkdə maraqlıdır və bunun üçün əlaqələrin şaxələndirilməsinə hazırdır. O qeyd edib ki, ilkin olaraq ikili diplom müqaviləsi çərçivəsində oxuyan tələbələrin sayının artırılması və bu müqavilənin magistr və doktorantlara da şamil edilməsi yaxın gələcəkdə mümkün ola bilər.
Daha sonra nümayəndə heyətlərinin də iştirakı ilə geniş müzakirə təşkil olunub. Tərəflər AzMİU və İTU-nun ortaq təşkilatçılığı ilə keçiriləcək “İnternational conference on modern problems of mathematics, mechanics and their applications” konfransı ilə bağlı görüləcək işlər, AzMİU gənc alim və doktorantlarının İTU-da staj keçməsi, elmi laboratoriya və məcmuələrdən qarşılıqlı istifadə, beynəlxalq qrant layihələrində uyğun elm sahələri üzrə birgə iştirak, doktorantlarla birgə elmi rəhbərlik və s. bu kimi məsələlər haqqında fikir mübadiləsi aparılıb.
Görüşdə müzakirə olunan məsələlər üzrə əlaqələrin qurulması və inkişaf etdirilməsi üçün işçi qrupu yaradılması və yaxın gələcəkdə AzMİU və İTU rektorları tərəfindən yeni əməkdaşlıq müqaviləsinin imzalanması qərar alınıb.
Qeyd edək ki, 2018-ci ildə AzMİU və İTU rektorlarının İstanbulda keçirilən görüşündə inşaat mühəndisliyi ixtisası üzrə ikili diplom protokolu imzalanıb. Protokola əsasən, hər il AzMİU-nun 5 tələbəsi İTU-ya, İTU-nun 5 tələbəsi isə AzMİU-ya göndərilir. Tələbələr iki tədris ilini AzMİU-da, digər iki tədris ilini isə İTU-da oxuyur və tədris kreditlərini bitirdikdən sonra onlara hər iki universitetin diplomu təqdim olunur.
