Elm və Təhsil Nazirliyinin Radiasiya Problemləri İnstitutunun Elmi şurasının növbəti iclası keçirilib.

Bu barədə "tehsil.media" institutdan bildirilib.

Tədbirdə çıxış edən institutun baş direktoru AMEA-nın müxbir üzvü İslam Mustafayev gündəlikdəki məsələləri iştirakçıların diqqətinə çatdırıb.

İclasda əvvəlcə institutun gənc alimi Nərmin Quliyevaya “Fəlsəfə doktoru” (biologiya üzrə) diplomu təqdim olunub. Həmçinin biologiya elmləri doktoru, professor Elimxan Cəfərovun “Bitki radiobiologiyası” adlı kitabının nəşri haqqında məsələ müzakirə edilib və çapa tövsiyə olunub.

Tədbirdə institutun Nizamsız bərk cisimlərin radiasiya fizikası laboratoriyasının aparıcı elmi işçisi vəzifəsini icra edən fizika elmləri doktoru, dosent Elçin Hüseynova “professor”, Radiokimya və radiopretektorlar laboratoriyasının böyük elmi işçisi biologiya üzrə fəlsəfə doktoru Zöhrə Müslümovaya və Polimerlər və elektroaktiv materialların radiasiya fizikası laboratoriyasının aparıcı elmi işçisi fizika üzrə fəlsəfə doktoru Nəbi Əliyevə “dosent” elmi adının verilməsi məsələlərinə baxılıb. Gizli səsvermənin nəticələrinə əsasən, elmi adların verilməsi qərara alınıb.

Həmçinin institutun icraçı direktoru fizika riyaziyyat üzrə fəlsəfə doktoru, dosent Rəvan Mehdiyeva müəssisənin 2023-cü il üzrə yarımillik hesabatını təqdim edib, Nizamsız bərk cisimlərin radiasiya fizikası laboratoriyasının rəhbəri AMEA-nın müxbir üzvü Oqtay Səmədov isə FD1.21 Dissertasiya şurasının 2225.01 Radiasiya materialşünaslığı və 2226.01 Radioekologiya ixtisasları üzrə təsdiq edilməsi ilə bağlı çıxış edib.

Sonda İslam Mustafayev kadr potensialının artırılması yönündə atılan addımlar, istifadəyə verilən yeni texnoloji avadanlıqlar, “Journal of Radiation Researches” beynəlxalq elmi jurnalının onlayn versiyada istifadəyə verilməsi, görülən təmir-bərpa işləri ilə bağlı məsələləri iclas iştirakçılarının diqqətinə çatdırıb.