"Mən birmənalı şəkildə bildirirəm ki, Paşinyan satqındır" - Vanetsyandan ŞOK AÇIQLAMA
"Mən birmənalı şəkildə bildirirəm ki, Paşinyan satqındır. Bu, siyasi qiymətdir".
tehsilmedia.info erməni mediasına istinadən xəbər verir ki, bu fikirləri Ermənistanın "Ana Vətən” partiyasının sədri Artur Vanetsyan deyib:
"Mən hələ də Ermənistanı daha təhlükəsiz görmək üçün mübarizəni davam etdirirəm. Amma ölkənin indiki hakimiyyəti bütün sahələrdə uğursuzluğa düçar olub. Bizim nailiyyətlərimizdən biri də odur ki, Nikol Paşinyan Azərbaycanla sülh sənədi imzalamadı. Əks halda Ermənistanın ərazisi də Azərbaycana təhvil veriləcəkdi”, - Artur Vanetsyan vurğulayıb.
Milli Təhlükəsizlik Xidmətinin keçmiş direktoru Nikol Paşinyanın parlamentdə növbəti absurd bəyanatla çıxış etdiyini dilə gətirib: "Paşinyanın sözlərinə görə, biz Azərbaycan SSR-nin ərazilərini tanımağa və bu sərhədlər daxilində delimitasiya və demarkasiya aparmağa hazırıq. Əgər o, SSRİ ərazilərindən danışırsa, demək "Artsax"ın Azərbaycana təslim edildiyindən danışa bilərik. Bəs Azərbaycan "anklavları”, onları da təslim edəcəkmi?”, – deyə Vanetsyan Paşinyanın bu addımı atacağına şübhə ilə yanaşmadığını diqqətə çatdırıb.
"Nikol Paşinyan öz planını sadəcə imzasız həyata keçirir. Delimitasiya və demarkasiyanı sənədsiz aparır. Sonuncu nümunə Tex kəndində baş verənlərdir. Bu insanlar uğursuz oldu, onların hakimiyyəti altında məğlubiyyət çarxı fırlanmağa davam edir. Mənim ifadələrim dəyişməyib. Mən birmənalı şəkildə təsdiq edirəm ki, Paşinyan satqındır. Bu, siyasi qiymətdir və əminəm ki, araşdırma aparılsa, deyilənlərin hamısı öz təsdiqini tapacaq”, - deyə Vanetsyan fikirlərini tamamlayıb.
