Prezident İlham Əliyevin sərəncamına əsasən regional təhsil sistemi yaransa da, regionlarda fəaliyyət göstərən sektor müdirləri yenə də köhnə qayda ilə işləyirlər. Yəni, məktəb direktorları və bağça müdirləri vəzifədə qalıb işləmələri üçün aylıq haqq-hesab ödəməlidir.

Bunlardan biri də uzun illər Qəbələ təhsilində metodist vəzifəsində işləmiş, lakin sonradan şahlıq quşu başına qonan, Qəbələ təhsilini öz qanunları ilə idarə edən, Qəbələ təhsil sektorunun müdiri Arifə Bayramovadır.
tehsil.media xəbər verir ki, Qəbələ rayonunda daxil olan məlumatda bildirilir ki, rayon təhsil sistemində çox ciddi problemlər və nöqsanlar mövcuddur.
Məlumat üçün bildirək ki, Qəbələ rayonu təhsil sistemi yeni yaradılmış Şəki-Zaqatala Regional Təhsil İdarəsinə tabedir.
Verilən məlumata görə, Arifə Bayramova Qəbələ təhsilini diz üstə çökdürüb. Məktəblərdən və uşaq bağçalarından yığılan aylıqlar birbaşa Arifə Bayramovanın şəxsi büdcəsinə gedir. Demək olar ki, Qəbələ rayonunda məktəb direktorları və bağça müdirləri artıq Arifə Bayramovanın əlindən təngə gəlib.
Bir sözlə, Qəbələ təhsili insana qarışıq bir bazarı xatırladır.
Bəhruz Mehdiyevin rəhbərliyi altında fəaliyyətə başlayan Şəki-Zaqatala Regional Təhsil İdarəsi hələ ki, özünü tam doğrultmamaqla yanaşı, həm də bir çox problemlərə seyrçi kimi yanaşamaqdadır. Qəbələdən verilən məlumatda qeyd edilir ki, vaxtı ilə rayonun Təhsil Şöbəsinin müdiri işləyən Arifə Bayramova yenə də köhnə “işlərini” davam etdirməkdədir. O, hazırda Şəki-Zaqatala Regional Təhsil İdarəsinin Qəbələ rayon üzrə Təhsil sektorunun müdiri vəzifəsini icra edir.
Bildirək ki, Qəbələ rayonunda 23 məktəbəqədər uşaq müəssisəsi, 2 məktəbdənkənar tərbiyə müəssisəsi, 53 tam orta məktəb,11 ümumi orta məktəb, 4 ibtidai məktəb fəaliyyət göstərir.

Məlumatda qeyd edilir ki, hazırda Qəbələ təhsil sistemindəki vəziyyət Arifə Bayramovanın vaxtı ilə şöbə müdiri olduğunda heç də fərqlənmir. Yəni, yenə də az kontingentli ibtidai siniflərin komplektləşdirilməsinin düzgün aparılmaması və siniflər üzrə şagirdlərin say həddinin gözlənilməməsi nəticəsində artıq paralel siniflər yaradılaraq büdcədən əlavə vəsaitlər mənimsənilir. Belə ki, Qəbələ məktəblərində işləyən bir çox müəllimlərin dərs saatları onların razılığı ilə artırılaraq hər ay büdcədən külli miqdarda vəsait çıxarılır. Artırılmış dərs saatlarından əldə edilən “gəlirin” bir hissəsi məktəb direktorlarına və sektor müdiri Arifə Bayramovaya çatır.
Qəbələ təhsilində Arifə Bayramovanın digər gəlir yerinin məktəblərdə fəaliyyət göstərən dərnəklər olduğu iddia edilir. Məlumata görə, adı olub, özü olmayan bu dərnəklərdə “keçirilən” dərs saatları üçün dövlət tərəfindən ödənilən vəsaitlərin yarısı sektor müdirinə çatır.
Qəbələ sakinləri isə kəndlərdəki orta və ümumi məktəblərdəki durumun həddindən artıq acınacaqlı olduğunu bildirirlər. Belə ki, bu məktəblərin əksəriyyətinin 10 və 11-ci siniflərində çoxlu sayda adı olub özü olmayan şagirdlərin olduğu deyilir. Hər bir məktəbin 10-cu və 11-ci siniflərində nə qədər “lipa” şagirdin olduğunu isə ən yaxşı və dəqiq bilən Arifə Bayramovadır.
İddiaya görə “lipa” şagirdlərin yerləşdirilməsinə nəzarəti və onlar üçün alınan illik haqqın yarı hissəsi də keçmişdə olduğu kimi, yenə də xanım Bayramovaya çatır.
Yəni deyə bilərik ki, Şəki-Zaqatala Regional Təhsil İdarəsinin yaradılmasına baxmayaraq, yenə də Qəbələ təhsil sistemi Arifə Bayramovanın əlində cəmləşib və onun şöbə müdiri olduğu dövrdəki kimi işləyir.

tehsil.media-ın əldə etdiyi məlumata görə, Arifə Bayramova artıq Şəki-Zaqatala Regional Təhsil İdarəsi ilə dil tapmağa başlayıb. Və onlar da Qəbələdə olan çarəsiz təhsil sisteminə göz yumurlar.

İnanırıq ki, bizim bu yazımızdan sonra Şəki-Zaqatala Regional Təhsil İdarəsi və Təhsil Nazirliyi Qəbələ təhsil sektor müdiri Arifə Bayramova haqqında ciddi tədbirlər görüb uçuruma gedən təhsili vəziyyətdən çıxaracaqlar.

Sözügedən məsələ ilə bağlı Qəbələ təhsil sektorunun müdiri Arifə Bayramova ilə əlaqə yaratmağa çalışsaq da, zənglərə cavab verən olmadı.
Qarşı tərəfin mövqeyini dinləməyə hazırıq.