Bu universitetlərdən pedoqoji ixtisasların çıxarılması təklifi etirazla qarşılandı: "Haqsızlıqdır"
Belə bir təklif var ki, özəl ali təhsil müəssisələri içərisində Xəzər Universiteti istisna olmaqla, digərlərindən pedaqoji ixtisaslar çıxarılsın.
Təhsil məsələləri üzrə tədqiqatçı Elmin Nuri Redaktor.az-a açıqlamasında verilən təklifi dəyərləndirərkən bildirdi ki, qeyd olunan məsələ ilə razı deyil:
"Bunun dünyanın çağdaş təhsil trendlərinin inkişafının tam əks qütbündə olduğunu düşünürəm. Bu gün dünyada, qonşu coğrafiyalarda, eləcə də ölkəmizdə özəl ali təhsil müəssisələrin inkişaf mexanizmi, müəssisəlrədə olan ixtisasların həm praktiki, həm də tədqiqat istiqamətində faydalılığı artır. Özəl təhsil müəssisələrindən pedaqoji ixtisasların çıxarılmasının hansı məntiqə əsaslandığını deyə bilmirik. Düzdür, qeyd olunur ki, Xəzər Universiteti istisnadır. Mənə maraqlıdır ki, hansı bazar araşdırmaları, tədqiqat işləri, keyfiyyət və kəmiyyət sorğusu aparılıb ki, biz bu istiqamətdə bir qənaətə gəlirik. Bu, hazırda təhsildə uğur qazanmış, istər müəllim olaraq, istər inzibati şəxs olaraq öz faydasını verə bilən həmin universitet məzunlarına qarşı bir növ haqsızlıqdır. Düzdür, bir neçə özəl təhsil müəssisələri var ki, orada nəinki pedaqoji, digər ixtisaslarla da bağlı tədris yüksək səviyyədə deyil. Amma bu o demək deyil ki, biz Xəzər Universitetini çıxmaq şərti ilə digərlərində pedaqoji ixtisasları ixtisara salmalıyıq. Mən bununla qəti razı deyiləm".
Həmsöhbətimiz vurğuladı ki, özəl universitetlər də artıq yeniliklər haqqında düşünməli, hazırkı təhsil bazasının, təhsil prinsiplərinin necə yaxşılaşdırılmalı olduğu ilə bağlı yol xəritəsini hazırlamalıdırlar:
"Məsələn, hansısa özəl təhsil müəssisəsində Azərbaycan dili və ədəbiyyat müəllimliyinin tədrisi 10-15 il bundan əvvəl necə aparılırdısa, indi də o formada aparılsa, yaxşı olmaz. Təhsili inkişaf etdirmək lazımdır. Azərbaycan Universiteti, Qərbi Kaspi Universiteti kimi özəl təhsil müəssisələrində, adlarını çəkmədiyim yerlərdə də uğurlu pedaqoji kadrlar varsa, deməli, ən azı biz bunu dəyərləndirməliyik. Bəli, hansısa qaydaları sərtləşdirmək, plan yerlərini sıxlaşdırmaq, keçid ballarını artırmaq, oradakı tədris prinsiplərini genişləndirmək olar, alternativlər çoxdur. Bir ixtisasın tədrisi uğurlu deyilsə, biz onu niyə kökündən kəsməliyik? Tutaq, kiminsə barmağında xəstəlik var və onu müalicə etmək yerinə kəsməyi düşünür. Müəyyən müalicə aparıldıqda və orqanizm lazımi qidaları qəbul etdikdə barmaq özü sağalır. İndi biz pedaqoji ixtisasları özəl təhsil müəssisələrindən çıxarmaqla məsələni tam həll etmiş oluruqmu? Təbii ki, yox. Biz boşluqları müəyyənləşdirməli, boşluqların üzərində işimizi qurmalı və rəqabət mühitini gücləndirməliyik".
