Abşeron-Xızı Regional Təhsil İdarəsinin müdiri İlhamə Abdullayeva bu gün Abşeron rayon Əfqan Qadaşov adına Pirəkəşkül kənd tam orta ümumtəhsil məktəbinin şagirdi Nilufər Şükürova ilə görüşüb.
Abşeron-Xızı Regional Təhsil İdarəsinin müdiri İlhamə Abdullayeva bu gün Abşeron rayon Əfqan Qadaşov adına Pirəkəşkül kənd tam orta ümumtəhsil məktəbinin şagirdi Nilufər Şükürova ilə görüşüb.
Görüş zamanı Nilufərin dünyanın nüfuzlu ali təhsil müəssisələrindən biri olan NYU Shanghai universitetinə qəbul olunması münasibətilə təbrikləri çatdırılıb, onun bu uğurunun region təhsili üçün böyük qürur mənbəyi olduğu vurğulanıb.
Qeyd edilib ki, Nilufər güclü akademik göstəriciləri və qlobal düşüncə tərzi ilə beynəlxalq tələbə kollektivi sırasına daxil olaraq ölkəmizi layiqincə təmsil edəcək.
Bildirilib ki, o, qəbul zamanı 72 min ABŞ dolları məbləğində dövlət tərəfindən maliyyələşdirilən təqaüd qazanıb və bu ali məktəbə qəbul olan ilk azərbaycanlı şagird kimi də fərqlənir.
Səmimi söhbət zamanı Nilufərin gələcək planları, elmi fəaliyyət istiqamətləri və beynəlxalq mühitdə qazanacağı təcrübənin əhəmiyyəti müzakirə olunub. İdarə müdiri ona təhsil həyatında yeni nailiyyətlər arzulayıb və hər zaman dəstək göstəriləcəyini bildirib.
Şagirdlərimizin hər bir uğuru bizim üçün böyük sevinc və qürurdur.
