Fevralın 25-də Mingəçevir Dövlət Universitetində əməkdaşların sağlamlığının qorunmasına və sosial rifahının yaxşılaşdırılmasına yönəlmiş yeni əməkdaşlıq təşəbbüsü həyata keçirilməyə başlanılıb. Bu məqsədlə Mingəçevir şəhərində fəaliyyət göstərən Regional Hospital ilə əməkdaşlığa dair Anlaşma Müqaviləsi imzalanıb.

MDU-dan AzEdu.az-a verilən məlumata görə, imzalanmış anlaşma universitetin sosial yönümlü fəaliyyətlərin genişləndirilməsinə dair yeni strategiyasına uyğun olaraq əməkdaşların sağlamlığının qorunması, profilaktik tibbi müayinələrin təşkili və keyfiyyətli tibbi xidmətlərə çıxış imkanlarının artırılmasını nəzərdə tutur.

Əməkdaşlıq görüşündə Mingəçevir Dövlət Universitetinin Həmkarlar İttifaqı Komitəsinin sədri Elçin Tağıyev, Keyfiyyət təminatı və akkreditasiya şöbəsinin müdiri Azad Mirzəbəyov, İş dünyası və məzunlarla əlaqə şöbəsinin müdir müavini Qurban Qurbanzadə və protokol üzrə koordinator Zərifə Fərruxlu iştirak ediblər. Regional Hospitalı isə direktor Anar Məmmədov, kardioloq, tibb elmləri doktoru Novruz Həsənov, androloq, tibb elmləri namizədi Vaqif Hüseynov, operator-həkim, ümumi cərrah Kurtuluş Urgur, terapevt Nurlan Əliyev və digər həkimlər təmsil ediblər.

Anlaşma çərçivəsində Mingəçevir Dövlət Universitetinin Həmkarlar İttifaqı Komitəsinin təşkilati dəstəyi ilə universitetin 50 əməkdaşı Regional Hospitalda kompleks profilaktik tibbi müayinə paketindən (full check-up müayinəsi) ödənişsiz istifadə edəcək. Müayinə proqramı əməkdaşların ümumi sağlamlıq vəziyyətinin qiymətləndirilməsinə yönəlmiş tibbi analiz və diaqnostik xidmətləri əhatə edir.

Bununla yanaşı, əməkdaşlıq çərçivəsində Mingəçevir Dövlət Universitetinin bütün əməkdaşları və tələbələri üçün Regional Hospitalda göstərilən tibbi xidmətlərə 20 faiz güzəşt tətbiq ediləcək. Bu imkan əməkdaşların tibbi xidmətlərdən daha əlçatan və sərfəli şəkildə yararlanmasına şərait yaradacaq.

Reallaşdırılan təşəbbüs Birləşmiş Millətlər Təşkilatının Dayanıqlı İnkişaf Məqsədlərindən 3-cü Məqsəd – Sağlam həyatın təmin edilməsi və rifahın yüksəldilməsi istiqamətində həyata keçirilən fəaliyyətlərə töhfə verir. Profilaktik tibbi müayinələrin təşkili əməkdaşların sağlamlığının erkən diaqnostikasına və qorunmasına xidmət edir.

Eyni zamanda, universitetlə səhiyyə müəssisəsi arasında qurulan əməkdaşlıq münasibətləri 17-ci Məqsəd – Məqsədlər naminə tərəfdaşlıq çərçivəsində institusional əlaqələrin genişləndirilməsinin nümunəsidir.

Qeyd edək ki, Mingəçevir Dövlət Universitetində əməkdaşların sosial rifahının və sağlamlığının qorunmasına yönəlmiş sosial təşəbbüslərin universitetin inkişaf strategiyasına uyğun olaraq gələcəkdə də davam etdirilməsi nəzərdə tutulur.