“Azərbaycanın sabahı bu gün məktəbdə formalaşır”
Abşeron rayon Qobu qəsəbəsi Ənvər İbrahimov adına 2 nömrəli tam orta ümumtəhsil məktəbinin direktoru Ələkbərova Xədicə Rəşid qızının fikirlərini tehsilmedia.info olaraq sizinlə fikirləşirik.
Son zamanlar dünya xəbərlərini izlədikdə, müxtəlif ölkələrdə baş verən iqtisadi sarsıntıları, siyasi gərginlikləri və cəmiyyətlər arasındakı parçalanmaları gördükcə bir daha Azərbaycan vətəndaşı olduğum üçün qəlbimdə böyük bir qürur hissi keçirirəm. Biz elə bir dövrdə yaşayırıq ki, ətrafımızda sanki bir fırtına qopur, lakin Azərbaycan bu fırtınanın ortasında sabitlik, sülh və daxili barış adası kimi dik dayanır. Bu hüzuru təmin etmək hər liderin işi deyildi; bunu yalnız uzaqgörənliyi, xalqına olan bağlılığı və dərin siyasi zəkası ilə cənab İlham Əliyev bacara bilərdi.
Onun illər boyu səbirlə, təmkinlə apardığı həm daxili, həm də xarici siyasət bu gün hər birimizin evindəki rahatlığın əsas təminatıdır. Biz 44 günlük Vətən Müharibəsi ilə təkcə torpaqlarımızı azad etmədik, həm də neçə illik nisgilimizə son qoyduq, keçmişimizin qisasını alaraq başımızı dik tutduq. Bu zəfər sadəcə meydanda qazanılmadı, bu, illərdir incə-incə toxunan, hər bir detalı mükəmməl düşünülmüş diplomatik gedişlərin və güclü dövlət iradəsinin nəticəsi idi. İndi biz sülh içində yaşayırıqsa, gələcəyə ümidlə baxırıqsa, bu, məhz dövlətimizin yürütdüyü o dərin və uzaqgörən siyasətin bəhrəsidir.
Dövlətimizin bu gücü və qətiyyəti özünü ən bariz şəkildə məhz təhsil sahəsində göstərir. Bir təhsil işçisi, bir məktəb direktoru kimi hər gün bu inkişafın canlı şahidi oluram. Artıq o dövrlər geridə qaldı ki, biz məktəblərin təchizatından və ya şəraitsizliyindən şikayət edirdik. Bu gün Azərbaycanın ən ucqar dağ kəndində belə müasir, hər cür avadanlıqla təmin olunmuş məktəblər ucalır. Dövlətimiz təhsilə sadəcə bir sahə kimi deyil, millətin gələcəyi kimi baxır və bura ayrılan vəsaitlər, xüsusi diqqət bunu sübut edir. Məktəblərimizdə tətbiq olunan yeniliklər, şagirdlərin dünya standartlarına uyğun biliklər alması üçün yaradılan innovativ şərait bizi xoşbəxt edir.
Müasir laboratoriyalar, yeni tikilən və əsaslı təmir edilən geniş, işıqlı sinif otaqları təkcə binadan ibarət deyil; bura gələcəyin alimlərinin, mühəndislərinin, vətənpərvər övladlarının yetişdiyi bir ocaqdır. Biz görürük ki, dövlətimiz "insan kapitalı"na investisiya qoyur, müəllimin nüfuzunu qaldırır və təhsilin keyfiyyətini hər şeydən üstün tutur. Bütün bunlar bir daha göstərir ki, güclü ordusu olan dövlətin həm də savadlı və müasir dünyagörüşünə sahib bir nəsli olmalıdır. Biz bu birliyin, bu inkişafın içində olduğumuz üçün özümüzü şanslı hiss edirik və üzərimizə düşən məsuliyyəti dərk edərək, bu uca amallara xidmət etməkdən qürur duyuruq.
