NÜMUNƏVİ DƏRS – COĞRAFİYA TƏHSİLİNDƏ YENİ YANAŞMA

Binəqədi rayonu 283 nömrəli tam orta məktəbin coğrafiya müəllimi İlahə Qurbanova 7-ci sinifdə “Azərbaycanda relyef formaları necə paylanmışdır?” mövzusunda nümunəvi dərs keçirib. Bu mövzu coğrafiya fənninin ən praktik, eyni zamanda ən çox bacarıq formalaşdıran mövzularından biri olmaqla, şagirdlərdə yalnız bilik deyil, həm də fəal vətəndaş mövqeyi, vətənpərvərlik və şəxsiyyət kimi formalaşma baxımından mühüm keyfiyyətlər yaradır.

Dərsin öyrənmə mühitindən kənarda, tamamilə interaktiv və qeyri-adi fonda təşkil olunması onu xüsusilə fərqləndirdi. Məhz bu yanaşmaya görə dərs bizim üçün “nümunəvi dərs ünvanı” statusu qazandı.

Dərs zamanı şagirdlərin Zəfər zirvəsi haqqında hazırladıqları təqdimat, şəhidlərin 1 dəqiqəlik sükutla yad edilməsi, eləcə də Zəfər zirvəsində Azərbaycan bayrağının dalğalanmasının vurğulanması şagirdlərdə milli qürur, fəxarət və tarixi yaddaşın formalaşdırılmasına xidmət etdi. Bu məqamlar dərsin təkcə akademik deyil, həm də dərin mənəvi-ideoloji məzmun daşıdığını açıq şəkildə nümayiş etdirdi.


Fiziki xəritə, kontur xəritə və iş vərəqlərindən məqsədyönlü istifadə edilməsi isə mövzunun daha yaxşı mənimsənilməsinə, analiz və tətbiq bacarıqlarının formalaşmasına şərait yaratdı. Dərsin uğuru, səmərəliliyi və estetik təqdimatı göz oxşayırdı.

Bu dərs bir daha sübut etdi ki, coğrafiya yalnız xəritə və terminlərdən ibarət deyil – o, vətəni tanıdan, vətəndaş yetişdirən, düşünən və məsuliyyətli şəxsiyyət formalaşdıran fəndir. İlahə Qurbanovanın təqdim etdiyi bu dərs pedaqoji ustalığın, yaradıcı yanaşmanın və milli dəyərlərə sədaqətin bariz nümunəsidir.