Elm və təhsil komitəsinin sədrindən 8 saatlıq iş rejimi ilə bağlı AÇIQLAMA: "Müəllim buna narazı ola bilməz"

"Mən həm də Ali Attestasiya Komissiyasında Ekspert Şurasının sədriyəm. Ədalətliyəm. Amma məni dərdə gətirən nədir? Çünki bütün hücumlar oradır: Ekspert Şurası buraxmır, mövzu təsdiq olunanda düz təsdiq olunmur, elmi rəhbər işə baxmır, müzakirədə heç kim oxumur, müdafiədə opponent oxumur, rəy verir. Bütün bunlar formal keçir, gəlir Ekspert Şurasına. Anar İsgəndərov da nə deyib? “Filankəs, 10 dəqiqə ərzində öz işinlə bağlı məlumat ver: problemin aktuallığı, problemin öyrənilmə səviyyəsi, problemin elmi yeniliyi və gəldiyin nəticə".

Redaktor.az xəbər verir ki, bu fikirləri Milli Məclisin Elm və təhsil komitəsinin sədri Anar İsgəndərov bu gün Sosial Tədqiqatlar Mərkəzində "Sosial-siyasi elmlər müasir çağırışları fonunda: Beyin mərkəzləri, akademik elm və universitetlər" mövzusunda keçirilən dəyirmi masada çıxışı zamanı qeyd edib.

O, sual etdi ki, bir insan 10 dəqiqə o tribunadan çıxış edə bilmirsə, Ali Attestasiya Komissiyası ittiham oluna bilərmi?

"Elə dövlət başçısı da qələbəmizin dörd şərtini göstərəndə, ikinci şərti nə idi? Qarabağ probleminin dünyaya çatdırılması. Sən gərək savad sahibi olasan ki, elmi tədqiqatların ola ki, sən gərək dünyaya çatdırasan ki, bu Qarabağ mənimdir, bu Qarabağ vaxtilə işğal olunmuşdur, işğal olunmuş ərazini də geri alırıq. Mən niyə bu problemləri burada bölüşdüm? Elm və təhsil hamının evində var. Yeganə təşkilatdır ki, hamı elm və təhsillə bağlı fikir söyləyə bilir. Doğru da söyləyir, yalan da söyləyir" - deyən Anar İsgəndərov elm və təhsil naziri Emin Əmrullayevin müəllimlərin 8 saatlıq iş rejiminə keçidlə bağlı açıqlamasına da toxundu:

"Hər gün yüz sual olur ki, Anar müəllim, necə ola bilər ki, saat hesabı dərs olmasın? Olur. Niyə olmur? Axı bu müəllimin əməkhaqqını qaldırmaq saat hesabı ilə olmur da, alınmır. Bir saata nə qədər pul verilməlidir? Ancaq müəllim səhər saat 9-dan tutaq ki, 4-ə, 5-ə qədər məktəbə gələndə, onun da əməkhaqqı normal ola bilər, artıq o müəllim də narazı ola bilməz. Bax, bu gün pilot layihə kimi, əgər 2027-ci ilə sürüləcəksə, bu, Azərbaycanın dövlət başçısının elm və təhsilə verdiyi qiymətdir".