Zəfər Günü bizim qürur günümüzdür. Vətənimizin bütövlüyü uğrunda canından keçən şəhidlərimizin ruhu qarşısında baş əyirik. Bu gün böyük sayğı, minnət və ehtiram günüdür. Biz bu günü qeyd edirik ki, gələcək nəsil qəhrəmanlıq tariximizi bilsin, vətən sevgisi ilə böyüsün.

Tehsilmedia.az qeyd edir ki, çox təəssüf ki, bəzi məktəblərdə bu günün mahiyyəti başqa cür anlaşılır. Qeyd edək ki, şagird və valideynlərdən məcburi formada xüsusi Zəfər geyimi, əsgər libası, papaq, bayraq, atributlar almaq tələb edilir. Bu, valideynləri ciddi şəkildə narahat edir.

Sual ortaya çıxır: Hansının ürəyi istəməz ki, övladı tədbirdə gözəl görünsün?
Hansının ürəyi övladını təmin etməkdən yan keçər?

Amma hər ailənin maddi imkanı eyni deyil. Bir ailədə 2-3 uşaq var. 40-50 manatlıq geyim tələbi bəziləri üçün böyük xərclə nəticələnir. Valideyn pul çatdırmayanda, övlad qarşısında özünü sındırır. Uşaq özünü fərqli və ya geri qalmış hiss edir. Bu isə təhsil mühitində psixoloji bərabərliyi pozur.

Unutmayaq: Zəfər Gününün mahiyyəti məcburi kostyumda deyil, uşaqlara şəhidləri tanıtmaqda,
onlara vətən sevgisi aşılamaqdadır.

Tehsilmedia.az bildirir ki, əgər məqsəd vətənpərvərlikdirsə – bunu şeir, mahnı, videoçarx, ədəbi-bədii kompozisiya, söhbət saatı ilə də yüksək səviyyədə təşkil etmək olar.

Həmçinin qeyd etmək lazımdır ki, əksər bağçalarda rəhbərlik geyim və atributları özləri hazırlayır, valideynə əlavə yük qoymur. Məktəblərdə isə bəzən bu məsələ məcburiyyətə çevrilir.

Bu düzgün deyil.

Təhsil müəssisəsi heç bir halda valideyni maddi öhdəliyə məcbur edə bilməz. Təhsil haqqında Qanun və Nazirliyin mövcud göstərişləri buna yol vermir.


Nə edilməlidir?

Məktəblərə rəsmi olaraq xatırladılmalıdır ki, məcburi geyim və ya atribut tələb etmək qanunsuzdur.

Direktor və müəllimlər gönüllülük prinsipini əsas tutmalıdır.

Tədbirlər sadə, mənalı və şərəfli formada keçirilməlidir — göstəriş, görüntü və büdcə yarışı ilə yox.