Attestasiyadan kəsilən 32 ilin müəllimi məhkəmədən əliboş QAYITDI

Bakı şəhərində yerləşən 11 saylı onbirillik Uşaq Musiqi məktəbinin müəllimi Mədəniyyə Nazirliyi tərəfindən keçirilən attestasiya imtahanından kəsilib.

Modern.az-ın əldə etdiyi məlumata görə, 32 il fortepiano dərsi keçən müəllim mart ayında işdən çıxarılıb.

O, attestasiyanın nəticələrinin ləğv edilməsi üçün məhkəməyə üz tutub.

Müəllim müraciət ərizəsində iddia edib ki, Bakı Xoreqrafiya Akademiyasında martın 5-də keçirilən attestasiya zamanı anidən şəkəri qalxıb və gözləri qaralıb. O, imtahan zamanı fortepianonu aydın görə bilmədiyini deyib. İmtahandan sonra ona kəsildiyi barədə məlumat verib.

Müəllimin sözlərinə görə, imtahandan sonra bir müddət xəstə yatıb, məktəbə gedəndə isə işdən çıxarıldığı barədə məlumat verilib. O, attestasiya ilə bağlı qanunvericiliyin pozulduğunu iddia edib.

Məhkəmədə bildirilib ki, müəllim Əmək Məcəlləsinin 70-ci maddəsinin “c” bəndinə əsasən tutduğu vəzifədən azad edilib və onunla bağlanmış əmək müqaviləsinə xitam verilib (peşəkarlıq səviyyəsinin, ixtisasının (peşəsinin) kifayət dərəcədə olmadığına görə işçinin tutduğu vəzifəyə uyğun gəlmədiyi barədə səlahiyyətli orqan tərəfindən müvafiq qərar qəbul edildikdə). Ona qanunvericiliyə uyğun olaraq 33 günlük son haqq-hesabının ödənilməsi təmin edilib.

Aparılmış araşdırmanın nəticəsi olaraq məhkəmə qərar verib və müəllimin iddiası mümkün hesab edilməyib.