Növbəti il buraxılış imtahanları çətin olacaq?

Dövlət İmtahan Mərkəzi (DİM) 2025-ci ildə ali təhsil müəssisələrinə qəbul imtahanının ikinci mərhələsində fənlər üzrə salınacaq proqramları açıqlayıb.
Bəs, görəsən, gələnilki proqramla builki arasında hansı fərqlər var?

Mövzu ilə bağlı təhsil eksperti Ramin Nurəliyev açıqlama verib.

“Bu jurnal hər il abituriyentlər üçün hazırlanılır. Jurnalda imtahana salına biləcək suallarla bağlı DİM-in planları yer alır. DİM istər, buraxılış, istərsə də, qəbul imtahanlarında bu məlumatları ictimaiyyətə açıqlayır.

Buraxılış imtahanında Azərbaycan dili, riyaziyyat və xarici dil fənləri üzrə ümumi proqramdan müəyyən suallar salınır.
Məsələn, Azərbaycan dili fənni üzrə imtahana salınan suallar 5-11 sinif dərsliklərini əhatə etdiyi halda, DİM abituriyentlərə jurnal vasitəsi ilə yol göstərir. Belə ki, orada abituriyentin hansı bölmə üzrə hansı mövzuya daha çox vaxt ayırmalı olduğu qeyd olunur. Ona görə də DİM hansı məqamlara imtahanda daha çox toxunacaqsa, bu jurnalda da onu qeyd edir. Bu qayda bütün fənlərə aiddir. Hər biri üzrə plan və proqramlar tərtib edilərək, abituriyentlərə hansı istiqamət üzrə daha diqqətli olmalarını bildirirlər.Repetitor yanında, eləcə də məktəbdə hazırlaşan abituriyentlərə müəllimlər bu məqamları izah edirlər. Çünki müəllimlər DİM-in “Abituriyent 1” jurnalına xüsusi diqqət ayırırlar
Elə abituriyentlər var ki, onlar evdə özləri hazırlaşırlar. Onlara tövsiyələrimiz ondan ibarətdir ki, DİM-in nəşr etdiyi bu jurnalla tanış olub, qeyd olunan mövzularla bağlı daha dərindən hazırlasınlar.

Bu əslində DİM-in abituriyentlər üçün qəbul proqramının asanlaşdırılmasıdır. 5-11 sinif ərzində keçirilən mövzuların hər birini abituriyent tam yadında saxlaya bilməz”.
Müsahibimiz qeyd edib ki, qəbul imtahanlarının modelində heç bir dəyişiklik olmayacaq:
“Gələnilki qəbul modeli builki kimi qalacaq. Əgər DİM tərəfindən hər hansısa dəyişiklik olarsa, bunu vaxtında abituriyentlərə çatdıracaqlar.
Suallar əgər builki kimi asan olarsa, o zaman nəticələr daha yaxşı olacaq. Fikrimcə, buraxılış imtahanı yenə çətin olmayacaq, amma blok imtahanları buraxılışa nisbətdə çətin olacaq.Burada abituriyentlərin də savad səviyyəsi rol oynayır. Düzdür, onların savad səviyyəsi illərə görə o qədər də dəyişmir. Əsas fərq yaradan sualların asan və ya çətin salınmasıdır. Daha çox vaxt tələbəb edən sualların çox olması həmin imtahanın çətinliyindən xəbər verir. Burada dəqiq ilkin proqnoz demək hələ tezdir. Yalnız şəxsi ehtimallar irəli sürmək mümkündür”.