Şagird sıxlığının qarşı necə alınmalıdır? – Çıxış YOLLARI
Son illər dövlət əyani ümumi təhsil müəssisələrində ikinci və üçüncü növbədə təhsil alan şagirdlərin sayında artım müşahidə edilir.
Bununla bağlı Bakı şəhəri üzrə Təhsil İdarəsinə üçnövbəli məktəblərlə bağlı sorğu ünvanladıq.
İdarədən sorğumuza cavab olaraq bildirildi ki, şagird sıxlığı səbəbindən ikinövbəli iş rejmində fəaliyyət göstərən 10 məktəbdə növbələrarası dərslər keçirilir:
“Ümumi təhsil müəssisələrində gün ərzində təhsil infrastrukturundan səmərəli istifadə etmək üçün mövcud qaydalara uyğun ayrı-ayrı siniflər üzrə növbələr əsasında tədris təşkil edilir. Şagird sıxlığı səbəbindən ikinövbəli iş rejmində fəaliyyət göstərən 10 məktəbdə növbələrarası dərslər keçirilir.
Qeyd edək ki, məktəblərin dərs günləri və növbəli iş rejimi müəssisənin layihə tutumu və təhsilalanların sayı əsasında təhsil müəssisəsinin Pedaqoji Şurasının verdiyi qərara əsasən tənzimlənir”.
Təhsilmedia.az-a açıqlama verən təhsil eksperti Elçin Əfəndi qeyd edib ki, məktəblərdə şagird sıxlığının qarşısını almaq üçün təhsil müəssisəsinin ərazisində fərdi korpus yaratmaq olar:
“Şagird sıxlığının qarşısını almağa çalışırıqsa, bunun üçün sıxlıq olan ərazidə yeni bir məktəb tikintisi ola bilər və ya həmin məktəbin ərazisində yer varsa, fərdi korpus yaratmaq olar. Belə olan halda artıq üçnövbəli rejim yox, ikinövbəli yaxud da birnövbəli dərslər keçirilə bilər. Həmçinin, əhalinin öz yaşadıqları ərazidə yerləşən məktəbdə təhsil alması bu sıxlığı aradan qaldıra biləcək nüanslardan biridir. Bizdə bir tendensiya formalaşıb. Bəzi valideynlər düşünürlər ki, şəhərin mərkəzində olan məktəb ən yaxşı məktəbdir və bunun üçün 5 km və ya ondan daha çox məsafə qət edirlər. Halbuki uşaq həmin ərazidə qeydiyyatda deyil. Təbii ki, bunun qarşısı birmənalı formada alınmalıdır”.
E.Əfəndi bildirib ki, valideynlər övladlarını öz yaşadıqları ərazidə məktəbə göndərsələr daha yaxşı olar:
“Bilirsiniz, biz bunu dəfələrlə demişik və artıq bu şablonlaşmış ifadəyə çevrilib. Burada valideynlər düşünməlidir ki, istənilən halda uşaq liseyə, ən yaxşı məktəbə də getsə, əgər ali təhsil müəssisələrində təhsil almağı düşünürsə, 9-10-11-ci siniflərdə mütləq hazırlığa gedəcək. Mövcud durum budur. Hazırda aparılan qəbul imtahanları model və digər amilləri nəzərə alsaq, bizim təəssüf ki, başqa alternativ seçimimiz yoxdur. Ona görə də valideynlər yaxşı olar ki, öz uşaqlarını yaşadıqları ərazilər üzrə qeydiyyata aldırsınlar”.
Ekspertin sözlərinə görə sıxlığın digər müşahidə olunduğu yer rus bölməsindədir:
“Evdə bu dilə bağlılıq yoxdursa, aparıb uşağı rus bölməsinə qoymağın bir mənası yoxdur. Yaxşı olar ki,onlar övladlarını Azərbaycan bölməsində təhsil almasına imkan yaratsınlar. Əgər məqsəd rus dilini öyrənməməkdirsə, 9-10-cu sinifdə gedib 1 il və ya 6 aylıq kurslarda dil öyrənə bilərlər. Bu kimi məqamlara diqqət yetirsək sıxlığın qarşısnı almaq olar və yaxud üçüncü növbə olmaya bilər”.
