Dərnək dərsləri kimlərə verilməlidir?

Məktəblərimizdə bu gün aktual olan problemlərdən biri də dərnək dərslərinin kimlərə verilməsidir. Bir çox müəllimlər əlavə dərs saatı götürmək istəsə də, buna nail ola bilmirlər. Burada ayrı-seçkilik olduğunu və hüquqlarının gözlənmədiyini bildirirlər. Direktorların məhz hansı meyarlara əsaslanaraq bu dərsləri "xüsusi" müəllimlərə verməsi müəllimlərdə sual doğurur.

Gəlin, əvvəlcə, baxaq-qanunla dərnək dərslərinə müəllimlər necə seçilirlər?

"Azərbaycan Respublikası Təhsil Nazirliyi sisteminə daxil olan ümumi təhsil
müəssisələrində müəllimlərə tələbatın müəyyənləşdirilməsi, pedaqoji kadrların
işə qəbulu və yerdəyişməsi" qanuna əsasən, "Müəllimlərin yalnız fakultativ, fərdi və qrup, dərsdənkənar məşğələlər və məktəbə hazırlıq qrupları üçün ayrılmış saatlara işə qəbuluna icazə verilmir. Təhsil Nazirliyinin 04 avqust 2017-ci il tarixli 238 nömrəli əmri ilə təsdiq edilmiş “Ümumtəhsil məktəblərində dərnəklərin təşkili qaydası”na əsasən dərnək rəhbəri yerli təhsili idarəetmə orqanı ilə razılaşdırmaqla məktəb direktorunun əmri ilə təyin və azad edilir."

Qanundan göründüyü kimi, direktor əmri verir. Hansı meyarların əsas götürülməsi isə naməlumdur. DQ, MİQ, Sertifikasiya ballarının əlaqəsi olması düşünülsə də, fərqli məktəblərdə fərqli müəllimlərin seçilməsi bu düşüncəni də aradan qaldırır. Görünür ki, bu "subyektiv" fikirləridir.