Azərbaycan İlahiyyat İnstitutu (Aİİ) Ümumdünya Fətva Evləri və Heyətləri Baş Katibliyinin müşaviri, Misirdə Azərbaycan diasporunun sədri, tədqiqatçı-alim Seymur Nəsirovun “Ərəb mənbələrində azərbaycanlı alim və ədiblər (VII-XVII əsrlər)” adlı kitabı nəşr olunub.

Bu barədə "tehsil.media" a institutdan məlumat verilib.

Kitabda Azərbaycan tarixi və coğrafiyası haqqında qısa məlumat verilməklə yanaşı, “Azərbaycan” sözünün ərəb dilində oxunma şəkilləri, mənası və nisbəsi haqqında bəhs edilib. Nəşrdə, həmçinin 121 mənbəyə istinad edilərək, başda böyük sərkərdə və dövlət xadimi Səlahəddin Əyyubi, Misirdə həkimlərin rəhbəri hesab edilən məşhur həkim Fətullah ibn Nəfis, Misirin baş hakimi Əfzələddin Xunəci, Misirin və Şamın qazısı İbn Qazıəsgər, fiqhin əsasları və ərəb dili qrammatikası üzrə böyük alim İbn əl-Həcib əd-Dvini olmaqla, hicri tarixi ilə II əsrdən X əsrədək elmin müxtəlif sahələrində yazıb-yaratmış yüz alimin həyat və yaradıcılığı haqqında məlumat verilib.

Azərbaycan İlahiyyat İnstitutu kitab və dərsliklərin nəşri ilə bağlı bir sıra layihələr həyata keçirir. “İlahiyyat nəşrləri” adı altında layihəyə institutun müəllimlərinin və bu sahədə çalışan mütəxəssislərin kitablarının müxtəlif dillərdən tərcümə olunmuş əsərlərinin nəşri daxildir. İnstitutun qarşısına qoyduğu məqsədlərdən biri də ilahiyyat sahəsindəki məsələləri araşdırmaq, beynəlxalq standartlara cavab verən tədqiqatlar aparmaq və onları nəşr etdirməkdir.