Azərbaycan Vokalçıları III Beynəlxalq Festivalı keçiriləcək - FOTO
Dekabr ayının 15-dən 22-dək ölkəmizdə Azərbaycan Vokalçıları III Beynəlxalq Festivalı baş tutacaq.
tehsil.media xəbər verir ki, Festivalın ideya müəllifi və bədii rəhbəri Azərbaycan Respublikasının Əməkdar artisti Ramil Qasımov festivalın keçirilməsində Azərbaycan Respublikasının Mədəniyyət Nazirliyinə və Azərbaycan Dövlət Akademik Opera və Balet Teatrının direktoru, Xalq artisti, dünya şöhrətli tenor Yusif Eyvazova təşəkkürünü bildirdi. Əməkdar artist artıq iki dəfə keçirilən, bu il üçüncü dəfə baş tutacaq festivalın Azərbaycan Dövlət Akademik Opera və Balet Teatrının layihəsi kimi ölkəmizin bir çox mədəniyyət və incəsənət məkanlarında keçiriləcəyini vurğuladı.
Festivalın açılışında müxtəlif incəsənət ustalarının, klassik ifaçıların ifası ilə baş tutacağını bildirən Ramil Qasımov qeyd etdi ki, bu ilki festival yeniliklərlə yadda qalacaq. O, ilk dəfə olaraq Azərbaycan bəstəkarlarının klassik vokal üslubunda yazılan yeni əsərlərinin təqdim olunacağını və bu işlə birbaşa olaraq Azərbaycan Bəstəkarlar İttifaqının sədri, Xalq artisti, bəstəkar Firəngiz Əlizadənin məşğul olduğunu bildirdi.
“Eyni zamanda 20 dekabrda Azərbaycan Dövlət Akademik Filarmoniyasında baş tutacaq “Bülbül Vokal Məktəbi” adlı konsert Azərbaycan professional vokal sənətinin banisi Bülbülün əziz xatirəsinə həsr olunacaq. Gecədə Azərbaycan klassik operalarından incilər səslənəcək. Həmçinin gecənin sonunda Xalq artisti, dünya şöhrətli tenor Yusif Eyvazov Ümummilli Lider Heydər Əliyevə həsr olunmuş musiqisi Xalq artisti Faiq Sücəddinova, sözləri İlqar Fəhmiyə məxsus əsəri ilk dəfə ifa edəcək”. - deyə Ramil Qasımov qeyd etdi.
Əməkdar artist Azərbaycan Vokalçıları III Beynəlxalq Festivalının təntənəli bağlanış mərasimi 22 dekabr Heydər Əliyev Mərkəzində baş tutacağını, “Viva Puççini” adlı gecədə Cakomo Puççininin operalarından əsərlər səslənəcəyini vurğuladı.
