Tanınmış dilçi alim Rəhilə Məhərrəmovanın 100 illik yubileyi qeyd olunub - FOTO
Dekabrın 1-də AMEA Nəsimi adına Dilçilik İnstitutunda tanınmış dilçi alim, filologiya elmləri doktoru, professor Rəhilə Məhərrəmovanın 100 illik yubileyinə həsr olunmuş elmi seminar keçirilib.
tehsilmedia.info xəbər verir ki, bu barədə "Tehsil.biz"ə institutdan məlumat verilib.
Tədbiri açan institutun baş direktoru professor Nadir Məmmədli Rəhilə Məhərrəmovanı Azərbaycan dilçiliyində öz yeri, mövqeyi, istiqaməti, dəst-xəti olan görkəmli alimlərdən biri kimi xarakterizə edib.
Məlumat verilib ki, Rəhilə Məhərrəmova 1923-cü ildə Bakıda anadan olub. 1945-ci ildə Azərbaycan Dövlət Universitetini (indiki Bakı Dövlət Universiteti) bitirib. 1949-cu ildə namizədlik, 1969-cu ildə doktorluq dissertasiyalarını müdafıə edib. 1945-ci ildən Dilçilik İnstitutunun Azərbaycan dili tarixi şöbəsində kiçik elmi işçi, böyük elmi işçi, şöbə müdiri vəzifələrində çalışıb. Ümummilli Lider Heydər Əliyevin 2001-ci il 18 iyun tarixli Fərmanı ilə Azərbaycan Respublikası Prezidentinin yanında yaradılmış Dövlət Dil Komissiyasının üzvü olub.
Diqqətə çatdırılıb ki, alimin dil tarixi, üslubiyyat, leksikologiya və dialektologiyaya dair 8 kitabı, 200-dən artıq məqaləsi respublika və xarici ölkələrdə, habelə bir məqaləsi UNESCO-nun xətti ilə bir neçə dildə nəşr olunub. O, onlarla əsərin elmi redaktoru, respublika və xarici ölkələrin elmi şuralarında doktorluq dissertasiyalarının rəsmi opponenti olub. İlk dilçi qadın alim Rəhilə Məhərrəmovanın “Sabirin söz dünyası” (2006), “Kitabi-Dədə Qorqud”un söz xəzinəsi” (2007) adlı böyük həcmli kitabları onun yaradıcılıq potensialının real göstəriciləridir.
Seminarda professor Sevil Mehdiyeva “Xatirələr”, filologiya üzrə fəlsəfə doktoru, dosent Reyhan Mədətova “Rəhilə Məhərrəmovanın həyat və yaradıcılığı”, filologiya elmləri doktoru, dosent Vahidə Cəfərzadə “Tarixdə iz qoyan alim” mövzularında məruzələrlə çıxış ediblər. Məruzələrdə bildirilib ki, Azərbaycan dilçiliyi tarixində professor Rəhilə Məhərrəmova qayğıkeş alim kimi yüksək ad qazanıb. Azərbaycanda dilçi kadrların hazırlanmasında professor Rəhilə Məhərrəmovanın böyük əməyi var.
Elmi seminarın sədri professor Sayalı Sadıqova vurğulayıb ki, Rəhilə Məhərrəmova 1969-cu ildə “Sabirin satirik əsərlərinin leksikası”, 1976-cı ildə isə “Sabirin dili” kitablarını nəşr etdirib. Alimin tədqiqatları nəinki respublika dilçilərinin, həmçinin bir çox türkoloqların diqqətini cəlb edib.
Sonra professor İsmayıl Məmmədli, filologiya elmləri doktoru Aynel Məşədiyeva, dosentlər Baba Məhərrəmli, Kifayət İmamquliyeva və Qətibə Mahmudova Rəhilə xanım haqqında xatirələrini bölüşüblər.
Alimin qızı, Bakı Dövlət Universitetinin müəllimi professor Sevinc Məhərrəmova tədbirin təşkilatçılarına və institut rəhbərliyinə minnətdarlığını bildirib.
