Alimlərimizin məruzəsi beynəlxalq konfransda müzakirə edilib
İnformasiya Texnologiyaları İnstitutunun şöbə müdiri texnika üzrə fəlsəfə doktoru, dosent Məkrufə Hacırəhimova və baş mütəxəssis Raqif İsmayılovun həmmüəllifi olduqları “Elmi kadrlar” Milli İnformasiya Sisteminin yaradılmasının konseptual əsasları” adlı məruzə Rusiyanın Kursk şəhərində keçirilən, institutun həmtəşkilatçısı olduğu “Təsvirlərin emalı və obrazların tanınması sistemlərində optoelektron avadanlıq və qurğular –Tanıma-2023” (Raspoznavaniye-2023) XVII beynəlxalq elmi-texniki konfransında müzakirə olunub.
Bu barədə "tehsilmedia.info"a institutdan məlumat verilib.
Hibrid formatda təşkil olunmuş konfransda məruzəyə dair çıxış edən R.İsmayılov tədqiqat işində Azərbaycanda elmi fəaliyyətlə məşğul olan əhalinin elektron reyestrinin və intellektual fəaliyyətinin nəticələrinin uçotunun avtomatlaşdırılmış sisteminin yaradılmasından bəhs edildiyini nəzərə çatdırıb. Bildirib ki, “Elmi kadrlar” Milli İnformasiya Sisteminin yaradılmasına konseptual yanaşma təklif edilib, sistemin əsas məsələləri formalaşdırılıb və funksional imkanları şərh olunub. Ölkə üzrə vahid informasiya məkanı əsasında təşkil edilmiş informasiya sistemi elmi potensialın inkişafı göstəricilərinin operativ analitik uçotunu və intellektual potensialın monitorinqini təmin edən proqram-informasiya kompleksi olaraq təqdim edilib.
Məruzəçi “Elmi kadrlar” Milli İnformasiya Sisteminin yaradılmasının elmi kadrlar, aparılan elmi tədqiqatlar haqqında informasiya resurslarının formalaşdırılmasına və elmi informasiyanın əlçatanlığının təmin edilməsinə imkan verdiyini bildirib. Qeyd edib ki, tədqiqatlar Azərbaycan Respublikasının elm və təhsil müəssisələrinin bazası əsasında aparılıb. Sistemdən istifadə elmi fəaliyyətin qiymətləndirilməsi və monitorinqi sahəsində idarəetmənin və tənzimləmənin təkmilləşdirilməsinə, təşkilatlar üzrə elmi fəaliyyətin monitorinqi və qiymətləndirilməsinin aparılmasına şərait yaradır.
