Azərbaycan Respublikasının Təhsil İnstitutunun (ARTİ) benefisiar olduğu Avropa İttifaqının maliyyə dəstəyi ilə həyata keçirilən “Azərbaycanda təhsil sisteminin dayanıqlığının gücləndirilməsi və AzMKÇ 5-ci səviyyə kvalifikasiyalarının təkmilləşdirilməsi üçün Elm və Təhsil Nazirliyinə dəstək” layihəsi çərçivəsində Elm və Təhsil Nazirliyinin, Azərbaycan Respublikasının Təhsil İnstitutunun, Peşə Təhsili üzrə Dövlət Agentliyinin və Təhsildə Keyfiyyət Təminatı Agentliyinin əməkdaşlarından ibarət 10 nəfərlik nümayəndə heyətinin Polşa Respublikasına təlim səfəri başlayıb.

ARTİ-dən "tehsil.media"a bildirilib ki, təlim səfərinin əsas məqsədi Polşa təhsil sistemində Milli Kvalifikasiyalar Çərçivəsi, peşə təhsili və təlimi, peşəyönümü xidmətinin təşkili, Təhsil Tədqiqatları İnstitutunun fəaliyyəti ilə bağlı mövcud təcrübəni öyrənmək və ölkədəki müvafiq qurumlarla qarşılıqlı əlaqələri gücləndirməkdir. Təlim səfəri cari ilin 31 iyul tarixində başlayıb və 4 avqust tarixində yekunlaşacaqdır.

Səfərin 1-ci günündə Kopernik Elm Mərkəzinə səfər edən qonaqlar ilkin olaraq təlim səfərindən gözləntiləri müzakirə edib, sonra isə mərkəzin fəaliyyəti ilə yaxından tanış olublar. Təlim səfərinin 2-ci günündə Azərbaycan nümayəndə heyəti Polşa Respublikasının Elm və Təhsil Nazirliyində olublar. Burada Polşanın Mərkəzi İmtahan Bürosunun direktor müavini Horacy Debowski qonaqları ümumilikdə milli təhsil sistemi və peşə təhsili səviyyəsində imtahanların təşkili barəsində məlumatlandırıb. Daha sonra nazirliyin rəhbər əməkdaşları Lech Boguta və Beata Dzieminska-Skowron tərəfindən Azərbaycan nümayəndə heyətinə inteqrasiya olunmuş kvalifikasiyalar sistemi, ümumtəhsil və peşə təhsili müəssisələrində peşəyönümü xidmətinin təşkili ilə bağlı təqdimatlar ediblər.

Polşa Respublikasının Təhsil Tədqiqatları İnstitutu təlim səfərində olan təhsil işçilərinin ziyarət etdikləri qurumlar arasında olub. Burada Azərbaycan nümayəndə heyətini institutun direktoru Ireneusz Baranowski və rəhbər əməkdaşı Michal Sitek qarşılayıb və onlara mərkəzin ümumi fəaliyyəti, həmçinin MKÇ-nin 5-ci səviyyəsində həyata keçirilən layihələr və proqramlar haqqında ətraflı məlumat verib. Daha sonra çıxış edən təhsil sahəsində ixtisaslaşmış yerli eskpertlər Agnieszka Szymczak və Monika Drzymulska-Derda tərəfindən Polşa Respublikasının Milli Kvalifikasiyalar Çərçivəsi, inteqrasiya olunmuş kvalifikasiyalar sistemi və MKÇ-nin 5-ci səviyyəsində peşə təhsili və təliminin təşkilində yerli təcrübə barəsində qonaqlara seminarlar keçirilib və onların mövcud suallarını cavablandırıblar.

Qeyd edək ki, sözügedən təlim səfəri davam edir.