İyunun 18-dən etibarən Bakı şəhərində ali təhsil müəssisələrinin Təsviri sənət istiqamətinin dekorativ tətbiqi sənət ixtisasının rəsm fənni üzrə qabiliyyət imtahanı keçirilməyə başlanılıb.

Bu barədə "tehsil.media"a Dövlət İmtahan Mərkəzindən məlumat verilib.

Bildirilib ki, imtahan müddəti 6 saatdır. Abituriyentlər bu imtahanda A2 formatlı kağız üzərində karandaşla naturadan antik başın rəsmini çəkirlər.

Ümumi (9 illik) orta təhsil bazasında orta ixtisas təhsili müəssisələrinin Musiqi sənəti istiqamətinə aid Şəki şəhərində 521 və 522-ci komissiyalar üzrə qeydiyyatdan keçən abituriyentlər iyunun 17-18-də, Lənkəranda 721, 722 və 723-cü komissiyalar üzrə qeydiyyatdan keçən abituriyentlər isə bu gün imtahanlarda iştirak ediblər. İndiyə qədər 152 abituriyent imtahanda iştirak edib.

Ümumi (9 illik) orta təhsil bazasında orta ixtisas təhsili müəssisələrinin Musiqi sənəti istiqaməti üzrə regionlarda olan imtahanlar onlayn qaydada təşkil olunur və iyunun 25-dək davam edəcək. Regionlardakı onlayn imtahanlar Bakı şəhərindən idarə olunur və prosesə nəzarət edilir. Onlayn imtahanlar zamanı komissiya üzvlərinin kimliyi abituriyentlərə açıqlanmır və onların görüntüləri bağlı saxlanılır. Komissiya üzvləri respublikanın ali, orta və ümumi orta təhsil müəssisələrinin müəllim heyəti arasından seçilir.

Xatırladaq ki, Naxçıvan şəhəri üzrə onlayn imtahanlar iyunun 19-20-də, Gəncə şəhəri üzrə iyunun 21, 22, 24-də və Bərdə şəhəri üzrə isə iyun 24-25-də keçiriləcək. Musiqi sənəti istiqaməti üzrə Bakı şəhərində keçiriləcək imtahanlar əyani qaydada təşkil olunacaq.

İyunun 19-dan Azərbaycan Dövlət Bədən tərbiyəsi və İdman Akademiyasında (Fətəli Xan Xoyski prospekti, 98) ali təhsil müəssisələrinin Bədən tərbiyəsi və idman istiqamətinin 63-cü komissiyası (Fiziki tərbiyə və çağırışaqədər hazırlıq müəllimliyi) üzrə imtahanlara start veriləcək. 63-cü komissiya üzrə abituriyentin ümumi fiziki hazırlıq imtahanından aldığı müsbət qiymət orta ixtisas təhsili müəssisələrinin 6401 və 152-ci komissiyalarına da şamil ediləcək.

Ali təhsil müəssisələrinin Teatr, kino və xoreoqrafiya istiqamətləri üzrə qabiliyyət imtahanları da iyunun 19-dan etibarən Bakı şəhəri 189-190 nömrəli tam orta məktəbdə keçirilməyə başlanılacaq.

Qeyd edək ki, ali təhsil müəssisələrinin xüsusi qabiliyyət tələb edən ixtisasları üzrə 19493 nəfər, orta ixtisas təhsili müəssisələrinin 11 illik təhsil bazasında ixtisasları üzrə 3850, 9 illik təhsil bazasında ixtisaslar üzrə isə 5470 abituriyent qeydiyyatdan keçib.

Abituriyentlər “İmtahana buraxılış vərəqəsi”ni qeydiyyatdan keçdikləri səhifədən çap edib götürə bilərlər. Buraxılış vərəqəsində qabiliyyət imtahanının yeri və tarixi göstərilir.

Xüsusi qabiliyyət tələb edən ixtisaslar üzrə müsabiqənin keçirilmə şərtləri haqqında “Abituriyent” jurnalının xüsusi buraxılışlarında ətraflı məlumat verilib. Jurnalın elektron variantını DİM-in saytından əldə etmək olar.