DİM-də idarəetmə zəifliyi. Məleykə Abbaszadə hara baxır?!
Tehsilmedia.info saytının rəhbəri Sakit Muradov keçirilən imtahan haqqında fikirlərini bildirdi.
17 may 2026-cı il tarixində keçirilən imtahanda hava şəraiti və tədbirlə əlaqədar yolların bağlanması ciddi problemlər yaratdı. Maraqlıdır, hər yerdə özünü ən ağıllı rəhbər kimi təqdim edən Məleykə Abbaszadə niyə bunları əvvəlcədən nəzərə almırdı? Axı hava proqnozu da var idi, belə tədbirlər də Azərbaycanda ilk dəfə keçirilmir. Qaydaları da bilirsiniz, vəziyyəti də görürsünüz.
Bu sistemsizlik şagirdləri çətin vəziyyətdə qoydu. Xəbərlər yayılır ki, gecikən bəzi şagirdlər imtahana buraxılmayıb. Sosial şəbəkələrdə insanlar məktəbin nömrəsinə qədər yazaraq bildirirlər ki, onları içəri buraxmayıblar.
İmtahan üçün ödəniş almağı bacarırsınız, dövlətin vəsaitini idarə etməyi bacarırsınız, amma belə vacib məqamları niyə nəzərə almırsınız? Üstəlik, KİV-ə də düzgün məlumat verilmir. İndi isə deyilir ki, guya gecikənlər ərizə yazsalar və müraciət çox olsa, bəlkə yenidən imtahan keçirilər.
Bu, ilk dəfə deyil. Keçən il də köçürmə halları səbəbindən bir neçə dəfə imtahan nəticələri ləğv olunmuş, yenidən imtahan keçirilmişdi. Amma nədənsə bu barədə ictimaiyyətə açıq məlumat verilmədi, hər şeyin qaydasında olduğu göstərildi.
Bir məsələ də var: suyun içində, stress və gərginlik içində olan uşaqları imtahana buraxmaq nə dərəcədə düzgündür? O vəziyyətdə şagird nə yaza bilər, nə də normal nəticə göstərə bilər.
Suallarınız da, testləriniz də, gördüyünüz iş də ortadadır. İndi isə problemləri həll etmək əvəzinə səhvləri ört-basdır etməyə çalışırsınız. Şagirdlərə qarşı bu münasibət sizə nə qazandırır?
