Lənkəranda “Sağlam və dayanıqlı şəhər naminə” ağacəkmə aksiyası təşkil edilib
Lənkəranda “Şəhərsalma və Memarlıq İli” çərçivəsində “Sağlam və dayanıqlı şəhər naminə” adlı növbəti ağacəkmə aksiyası keçirilib.
AZƏRTAC-ın bölgə müxbiri xəbər verir ki, şəhərin Heydər Əliyev prospektində təşkil olunan aksiyada Lənkəran Şəhər İcra Hakimiyyətinin rəsmiləri, rayonun idarə və müəssisələrinin əməkdaşları, müxtəlif xidmət sahələrinin nümayəndələri, ictimaiyyət üzvləri və könüllülər fəal iştirak ediblər.
Ətraf mühitin qorunması və təbii resursların səmərəli istifadəsini təşviq etmək məqsədilə təşkil olunan ekoloji aksiyada bir hektar ərazidə 600 həmişəyaşıl Eldar şamı ağacı əkilib, ağaclar suvarılıb və dayaqlarla bərkidilib.
Bu cür aksiyalar insanların ekoloji problemlər barədə məlumatlılığını artırmaqla yanaşı, onları təbiətə qarşı daha məsuliyyətli davranmağa təşviq edir, eyni zamanda, cəmiyyətin ekoloji şüurunun formalaşmasında mühüm rol oynayır və daha sağlam, yaşıl gələcəyin qurulmasına xidmət edir.
