DİM məktəblərə 105 mindən çox tədris vəsaiti göndərib

Dövlət İmtahan Mərkəzi tərəfindən müntəzəm olaraq regionlarda yerləşən məktəblərə müxtəlif vəsaitlər hədiyyə olunur. Proses bu il də davam etdirilir.

AzEdu.az xəbər verir ki, müvafiq regionda yerləşən rayonların məktəblərinə təqdim olunmaq üçün Mərkəzin Göyçay, Şəki, Xaçmaz, Lənkəran, Gəncə, Şirvan, Naxçıvan, Bərdə və Şəmkir regional bölmələrinə ümumilikdə 146 adda 105253 ədəd vəsait göndərilib.

Sözügedən nəşrlərə test topluları, siniflər üzrə qiymətləndirmə tapşırıqları, metodik vəsaitlər və digər tədris yönümlü kitablar daxildir.

Göndərilmiş vəsaitlər regional bölmələrin əməkdaşları tərəfindən mərhələli şəkildə regionlarda fəaliyyət göstərən ümumtəhsil müəssisələrinin kitabxanalarına əvəzsiz təqdim olunur.

Təqdim olunan vəsaitlərdən müxtəlif siniflərdə təhsil alan şagirdlər, qəbul imtahanlarına hazırlaşan abituriyentlər, eləcə də müəllimlər faydalana bilərlər. Bu təşəbbüs şagirdlərin bilik və bacarıqlarının inkişafına, imtahanlara hazırlıq prosesinin daha səmərəli təşkilinə xidmət edir.