ETN niyə çörəyi çəkməçiyə verir?
Elm və Təhsil Nazirliyinin tabeliyində fəaliyyət göstərən Peşə Təhsilinin İnkişafı Fondu ümumi dəyəri 2 milyon manata yaxın olan təlim yönlü layihəni ETN məmurlarının qohumlarının məxsus MMC ilə bağlayıb. KİV-lərin verdiyi məlumata görə, hər iki satınalma açıq tender keçirilmədən – “bir mənbə” üsulu ilə reallaşdırılıb. Söhbət dövlət büdcəsi hesabına maliyyələşən layihələrdən gedir.
Müqavilələrdən biri qısamüddətli təlimlərin təşkili ilə, digər müqavilə isə işğaldan azad edilmiş ərazilərə Böyük Qayıdış proqramı çərçivəsində peşə hazırlığı kurslarını əhatə edir.
Satınalmaların hər ikisi rəqabət proseduru keçirilmədən həyata keçirilib. “Bir mənbədən” satınalma o deməkdir ki, dövlət qurumu alternativ təklifləri müqayisə etmədən birbaşa seçilmiş şirkətlə müqavilə bağlayır.
Qanunvericilik belə imkanı istisna hallarda nəzərdə tutur.
ETN universitetləri onların heç bir maliyyə bazası olmadan icbari qaydada PHŞ etdi. Bu layihəni 2-3 univetsitet arasında bölmək olmadımı?
Necə olur ki, ETN-nin akkreditasiyasından keçən, bakalavr və magistr hazırlayan universitetlər yox, heç bir rəsmi təhsil akkreditasiyası olmayan MMC 20 ildir ki, davamlı olaraq TN və ETN-nin yaxından himayəsi ilə belə böyük layihələr ala bilir?
Yaxşı yadımdadır, 13 il əvvəl TN-dən gənc bir menecer (hansısa özəl kursdan TN -ə transfer edilmişdi), bizim universitetə bir təkliflə gəlmişdi. Rektor onunla görüşüb məsəlini müzakirə etməyi mənə həvalə etmişdi. Görüşdük, biz onunla tanış idik.Məni 1-2 ay əvvəl nazirliyə dəvət etmişdilər, məsləhət almaq üçün, onda tanış olmuşduq.
Təklif məktəb direktorları üçün təlimlərin keçirilməsi ilə əlaqədar idi. Gənc menecerə dedim ki, yaxşı təşəbbüsdür, bizim universitetdə (yəni, ADPU-da) uzun müddət məktəb direktorlarının ixtisasartırma fakültəsi və bu adda kafedra olub. Təcrübəmiz və kadrlarımız var. TN "elçi"si dedi ki, biz bu təlimlərin təşkilinə ADPU ilə birgə bir QHT-ni də cəlb edəcəyik, pulu onlara köçürdəcəyik, təlimləri isə siz aparacaqsınız. Maliyyə pozuntusu və universitetin reputasiyasının zədələnəcəyini hiss etdim. O qurumun adını eşidəndə isə mən bu təklifdən qəti imtina etdim. Dedim ki, 90 illik universitet ildə 4000 müəllim hazırladığı halda, 200 məktəb direktoruna 10 günlük təlim keçə bilməyəcəkmi? Bu QHT bizə lazım deyil. Həm də bu QHT əvvəlki nazirin vaxtında TN-dən hər il milyonlarla dəyərində layihələr alıb və keyfiyyətsiz icra edib, KİV-lərdə bu haqda çoxlu məqalələr dərc edilib. Bu səbəbdən biz universitetimizin adının belə bir qurumla birgə hallanmasına razı deyilik.
Siz istəsəniz TN olaraq, belə şübhəli maliyyə əməliyyatını o qurumla davam etdirə bilərsiniz, amma bizsiz ya da biz tək icra edəcəyik.
Sonra rektora söhbətin məzmununu bildirəndə, mənə dedi ki, düz demisiniz. Heç mən də razı olmazdım buna, həm də o qurum haqqında mən də neqativ məlumatlar eşitmişəm.
Beləliklə TN ilə bu şübhəli "əməkdaşlıq" alınmadı. Amma o QHT bu günə qədər də TN və ETN "tərəfdaşı"dir, yenə də hər il nazirlikdən milyonlarla manatlıq layihələr alır. Düzdür indi adını dəyişib, amma texnologiya dəyişməyib, nə ETN-də, QHT -də.
İndi o məmur da, QHT sədri də çox yüksək postlardadılar. Universitetlər isə PHŞ olaraq qəpiyə güllə atır, maaşları da heç artıra bilmir.
