Adəm İsmayıl Bakuvi: “Azərbaycan ərazisi İrana qarşı istifadə oluna bilməz"
“Son günlər ABŞ-nin öz hərbi-dəniz donanmasının kifayət qədər böyük hissəsini Yaxın Şərqə gətirməsi İran-ABŞ münasibətlərində gərginliyin yeni mərhələyə keçdiyini göstərir. Düşünürəm ki, ABŞ-nin bu addım təkcə hərbi hazırlıq kimi yox, Vaşinqtonun bölgədəki təhlükəsizlik arxitekturasını nəzarətdə saxlamaq niyyətinin açıq siqnalı kimi qiymətləndirilməlidir. Beynəlxalq medianın iki ölkə arasında mümkün müharibəni “qaçılmaz” ssenari kimi təqdim etməsi, habelə İsrail mediasında da yaxın həftəlır ərzində qarşıdurmanın başlaya biləcəyi ilə bağlı məlumatların yayılması risklərin nə qədər yüksəldiyini açıq şəkildə ortaya qoyur”.
Bu sözləri Paralel.az-a açıqlamasında Vəhdət Partiyasının sədri Adəm İsmayıl Bakuvi deyib.
Partiya sədrinin sözlərinə görə, bu fonunda İran rəsmilərinin bir tərəfdən ABŞ ilə “ədalətli və bərabərhüquqlu nüvə razılaşması”na hazır olduqlarını bəyan etməsi, digər tərəfdən isə istənilən hərbi addımı genişmiqyaslı müharibə kimi dəyərləndirəcəklərini vurğulaması Tehran rəhbərliyinin ziddiyyətli və getdikcə zəifləyən siyasi xəttini nümayiş etdirir:
“Sərt ritorika daxili auditoriyaya güc mesajı vermək məqsədi daşısa da, real nəticə etibarilə İranın beynəlxalq manevr imkanlarını daraldır və ölkəni daha dərin təcrid vəziyyətinə sürükləyir. İranın mövcud yanaşması cəmiyyətin əsas ehtiyacları ilə uzlaşmır. Uzun illərdir davam edən sanksiyalar, iqtisadi durğunluq, sosial gərginlik və gələcəyə dair qeyri-müəyyənlik İran cəmiyyətini ciddi şəkildə yorub. Bu baxımdan, davamlı qarşıdurma və müharibə riski İran üçün strateji üstünlük yox, əksinə, struktur zəifliyin açıq göstəricisidir. Cəmiyyətin real gözləntisi hərbi güc nümayişi deyil, sabitlik, iqtisadi açılım və beynəlxalq əlaqələrin normallaşmasıdır. ABŞ-nin bölgədə artan hərbi mövcudluğunu bu kontekstdə yalnız təzyiq mexanizmi kimi yox, qarşısıalınmaz eskalasiyanın preventiv addımı kimi də düşünmək olar”, – deyə A.Bakuvi qeyd edib.
Pariya sədri o cümlədən hesab edir ki, Yaxın Şərqdəki son durum onu göstərir ki, ABŞ təkcə müttəfiqlərinin deyil, dolayısı ilə İran cəmiyyətinin də təhlükəsizlik maraqlarına xidmət etmək istəyir. Hazırkı mərhələdə ABŞ ilə real, işlək və beynəlxalq təminatlara əsaslanan razılaşma İran üçün əlçatan görünmür:
“Əgər bu baş verərsə, yəni belə bir razılaşma müharibə riskini minimuma endirə, sanksiyaların mərhələli şəkildə aradan qaldırılmasına zəmin yarada və İranın beynəlxalq sistemə inteqrasiyasını sürətləndirə bilər. Bu isə İran cəmiyyəti üçün yeni sosial-iqtisadi perspektivlər və nisbi sabitlik deməkdir. Nəticə etibarilə, mövcud gərginliyin taleyi hərbi ritorikanın davam etdirilməsindən deyil, düşünürəm ki, vaxtilə ABŞ-nin təklif etdiyi dialoq və məsuliyyətli əməkdaşlıq xəttinin qəbul olunmasından asılı idi. ABŞ bu prosesdə təkcə güc mərkəzi kimi bölgəni daha geniş və dağıdıcı münaqişədən çıxara biləcək əsas stabilizasiya və xilasedici aktor kimi ön plana çıxır”.
Bakuvi son olaraq bildirib:
“Mümkün hərbi qarşıdurma baş verəcəyi təqdirdə, bu proseslərin region ölkələrinə də müəyyən təsirləri istisna edilməməlidir. Bununla belə, Azərbaycan regional sabitliyin qorunmasını prioritet hesab edir və öz ərazisinin üçüncü dövlətlər tərəfindən İrana qarşı istifadəsinə qəti şəkildə yol verməyəcək. Bu mövqe Azərbaycanın balanslı və məsuliyyətli xarici siyasət xəttinin əsas prinsiplərindən biridir. Sözügedən prinsip dəfələrlə cənab Prezident İlham Əliyev tərəfindən açıq və birmənalı şəkildə ifadə olunub. Rəsmi Bakı regionda gərginliyin artmasında deyil, dialoq və qarşılıqlı hörmətə əsaslanan münasibətlərin qorunmasında maraqlıdır”
