“Zəfərdən təhsilə”: Zəngilan rayonu Ağalı kənd tam orta ümumtəhsil məktəbi
“Böyük Qayıdış” proqramı çərçivəsində işğaldan azad edilmiş ərazilərdə təhsil infrastrukturunun bərpası və yenidən qurulması istiqamətində həyata keçirilən ardıcıl tədbirlər nəticəsində müasir standartlara cavab verən təhsil müəssisələri mərhələli şəkildə fəaliyyətə başlayıb. Bu müəssisələrdən biri də 2022-ci ildə istifadəyə verilən Zəngilan rayonu Ağalı kənd tam orta ümumtəhsil məktəbidir.
Bu barədə AzEdu.az-a Elm və Təhsil Nazirliyindən məlumat verilib.
Nazirlikdən bildirilib ki, məktəbdə hazırda ümumilikdə 288 şagird təhsil alır. Tədris prosesinin səmərəli təşkili üçün məktəbdə 18 müəllim fəaliyyət göstərir. Eyni zamanda, təhsil müəssisəsinin inzibati və texniki təminatının dayanıqlı şəkildə həyata keçirilməsi məqsədilə 7 texniki işçi çalışır. Bu göstəricilər məktəbin həm pedaqoji, həm də idarəetmə baxımından formalaşmış struktur olduğunu nümayiş etdirir.
Zəngilan rayonu Ağalı kənd tam orta ümumtəhsil məktəbi müasir texniki və tədris infrastrukturu ilə də seçilir. Məktəbdə STEAM otağı, İKT kabineti, 3 laboratoriya, kitabxana və idman zalı şagirdlərin istifadəsinə verilib. Bu imkanlar şagirdlərin bilik və bacarıqlarının inkişafına, onların müasir təhsil mühitində formalaşmasına şərait yaradır.
Qeyd edək ki, Ağalı kənd tam orta ümumtəhsil məktəbində yaradılan bu imkanlar şagirdlərin doğma torpaqlarda keyfiyyətli təhsilə çıxışının təmin olunmasına, eləcə də bölgədə dayanıqlı sosial həyatın qurulmasına mühüm töhfə verir.
