Məktəblər açıldı, səsyazıları başladı...
Cəmi iki həftədir ki, məktəblər fəaliyyətə başlayıb, amma hər gün bir səs yazısı ortalığa atılır: “filan məktəbdə pul yığılır”, “filan müəllim valideynləri məcbur edir” və s. Sosial şəbəkələrdə bu səsyazıları ildırım sürəti ilə yayılır, nəticədə tanıyan-tanımayan, mövzudan xəbəri olan-olmayan hər kəs başlayır məktəbi qaralamağa.
Əslində, bu cür hallarda ilk addım araşdırma olmalıdır. Çünki bu gün yayılan səsin müəllifinin kimliyi dəqiq bilinmir: bu, doğrudan da valideyndir, ya müəllim? Yoxsa ümumiyyətlə, məktəblə əlaqəsi olmayan, hansısa şəxsi marağı üçün qarayaxma kampaniyası aparan biridir? Hətta ola bilər ki, həmin insan sadəcə dava-dalaş axtaran, “qarışdırmaq”dan zövq alan biri olsun.
Təəssüf ki, Elm və Təhsil Nazirliyi rəhbərliyi hər dəfə belə hallarda soyuq başla araşdırma aparmaq əvəzinə, sosial şəbəkədə yaranan təzyiqin təsiri ilə dərhal qərar verməyə üstünlük verir. Nazir Emin Əmrullayev elə təsir bağışlayır ki, guya ictimai fikirdən yox, “məcburiyyət”dən çıxış edir: kiminsə paylaşımı ilə oturur-durur, nəticədə müəllimlər işdən azad edilir, amma hadisənin mahiyyəti çox vaxt qaranlıq qalır.
Tehsilmedia.az bildirir ki, əlbəttə, real neqativ hallar da ola bilər – pul yığılması, ayrı-seçkilik, haqsız davranış. Amma bunlar sistemi qaralamaq üçün fürsət axtaranların əlinə alət çevrilməməlidir. Təhsil sahəsi onsuz da cəmiyyətin ən çox diqqət mərkəzində olan sahədir. Burada hər şaiyə, hər əsassız səsyazısı bir məktəbin, bir müəllimin, hətta bütöv sistemin adına zərbə vurur.
Ona görə də çıxış yolu aydındır: hər deyilənə inanmaq olmaz. Hər səs yazısına görə günah keçisi axtarıb müəllimləri və məktəbləri hədəfə gətirmək əvəzinə, obyektiv araşdırma mexanizmi işlədilməlidir. Əks halda, məktəbin qapısı açılan kimi qara günlərin də başladığını görəcəyik – fürsətcil insanlar üçün isə bu, əsl meydan olacaq.
Təhsil sistemi sosial şəbəkə emosiyaları ilə yox, ədalətli və prinsipial araşdırmalarla idarə olunmalıdır. Yoxsa “səsyazısı”nı əsas götürüb qərar vermək, həm müəllimləri, həm də cəmiyyəti çaşqınlıq içində saxlamaq deməkdir.
