Bakı Dövlət Universitetinin (BDU) Ekologiya və torpaqşünaslıq fakültəsinin təşkilatçılığı ilə Ümummilli Lider Heydər Əliyevin 100 illik yubileyinə həsr olunmuş "Ekologiya və torpaqşünaslıq elmləri XXI əsrdə” adlı Respublika elmi konfransı keçirilib.

BDU-dan "tehsil.media"a bildirilib ki, Dövlət Himninin səsləndirilməsi ilə başlanan tədbirdə Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib.

Konfransda çıxış edən Ekologiya və torpaqşünaslıq fakültəsinin dekanı Akif Ağbabalı müstəqil dövlətimizin memarı və qurucusu Ulu Öndər Heydər Əliyevin müasir Azərbaycan tarixindəki rolu, demokratik, hüquqi dövlət quruculuğu istiqamətində həyata keçirdiyi islahatlar, respublikamızın ətraf mühitinin qorunması sahəsindəki xidmətləri və ekoloji siyasəti barədə ətraflı məlumat verib. Bildirib ki, Ümummilli Lider Heydər Əliyev bütün ictimai-siyasi fəaliyyəti dövründə Azərbaycanın inkişafı üçün çalışıb, millətimiz, xalqımız üçün əlindən gələni əsirgəməyib.

Konfransın plenar iclasında Torpaqşünaslıq və daşınmaz əmlakın kadastrı kafedrasının müdiri, akademik Qərib Məmmədovun "Heydər Əliyevin aqrar islahat modeli”, Ekoloji kimya kafedrasının müdiri, professor Sevinc Hacıyevanın "Ulu Öndər Heydər Əliyevin irsi”, Coğrafi ekologiya kafedrasının professoru Şövqisəfa Göyçayskinin "Ümummilli Lider Heydər Əliyevin irsi həmişəyaşardır”, Həyat fəaliyyətinin təhlükəsizliyi kafedrasının müdiri İsmayıl Əliyevin "Müstəqil Azərbaycanın memarı” və Coğrafi ekologiya kafedrasının dosenti Tahir İbrahimovun "Heydər Əliyev və Azərbaycan təbiətinin mühafizəsi” mövzularında çıxışları dinlənilib.

Çıxışlarda Ulu Öndərin Azərbaycanda siyasi hakimiyyətə qayıdışı ilə ölkənin davamlı inkişaf yoluna qədəm qoyduğu, sabitliyin bərqərar olunduğu, xarici siyasətdə böyük uğurlar qazanıldığı vurğulanıb.

Daha sonra konfrans işini bölmə iclasları ilə davam etdirib. İşğaldan azad edilmiş ərazilərin ekoloji problemləri, təbii mühitin yenidən bərpasının istiqamətlərinin müzakirə olunduğu bölmə iclaslarında BDU, Elm və Təhsil Nazirliyinin tabeliyində olan Mikrobiologiya, akademik Yusif Məmmədəliyev adına Neft-Kimya Prosesləri İnstitutu, akademik Həsən Əliyev adına Coğrafiya İnstitutu, Torpaqşünaslıq və Aqrokimya İnstitutu, Milli Aerokosmik Agentliyin Ekologiya İnstitutu, Azərbaycan Dövlət Pedaqoji Universiteti, Bakı Mühəndislik Universiteti, Azərbaycan Texniki Universiteti, Mingəçevir Dövlət Universiteti və digər təşkilatların əməkdaşlarının məruzələri dinlənilib.

Konfrans öz işini sabah bölmələr üzrə davam etdirəcək.