Direktorlarının maaşlarına 1500 manatadək əlavələr edilib - HESABAT
2022-2024-cü illərdə 65 min nəfərə yaxın müəllim sertifikatlaşdırmaya cəlb edilmişdir. Azərbaycan Respublikası Nazirlər Kabinetinin 2022-ci il 20 avqust tarixli 321 nömrəli Qərarına uyğun olaraq sertifikatlaşdırma prosesini uğurla keçmiş ümumilikdə 55 min nəfər olmaqla, 38 min nəfərdən çox müəllimin əməkhaqqına 10%, 17 min nəfərdən çox müəllimin əməkhaqqına isə 35% əlavə tətbiq edilmişdir. Nəticədə əməkhaqqına 10% əlavə tətbiq olunmuş müəllimlər üzrə orta aylıq əməkhaqqı 980 manat, əməkhaqqına 35% əlavə tətbiq olunmuş müəllimlər üzrə isə orta aylıq əməkhaqqı 1295 manat təşkil etmişdir.
AzEdu.az xəbər verir ki, bununla bağlı Nazirlər Kabinetinin 2024-cü il üzrə fəaliyyətinə dair hesabatında ümumi məlumat öz əksini tapıb.
Azərbaycan Respublikası Prezidentinin 2022-ci il 18 avqust tarixli 1815 nömrəli Fərmanı ilə səriştə və nəticə əsaslı diferensiallaşdırılmış, ümumi təhsil müəssisələrinin rəhbər işçilərinin və təhsilverənlərin vəzifə maaşlarına sertifikatlaşdırmanın nəticəsinə görə aylıq əlavələr müəyyən edilmişdir.
Məktəb direktorlarının mövcud əməkhaqqına şagird sayından asılı olaraq 600 manatdan 1500 manatadək, direktor müavinlərinin əməkhaqqına isə 200 manatdan 500 manatadək əlavələr edilmişdir.
