Azərbaycan Memarlıq və İnşaat Universitetinin (AzMİU) rektoru professor Gülçöhrə Məmmədova 2024/2025-ci tədris ilinin payız semestrinin qış imtahan sessiyasında yüksək nəticə göstərən və ictimai, sosial fəaliyyətlərdə fərqlənən tələbələrlə görüşüb.

Görüşdə tələbələrin akademik uğurlarına diqqət yetirilib, həmçinin onların universitetin sosial və ictimai həyatına verdikləri töhfələr müzakirə olunub.

AzMİU-nun Tələbə Həmkarlar İttifaqı Təşkilatının (THİK) sədri Şahmar Rəfili çıxış edərək tələbə təşkilatlarının ictimai və sosial sferada apardıqları işlərdən, tələbələrin fəaliyyətlərini dəstəkləyən təşəbbüslərdən bəhs edib. O, universitetdəki sosial fəaliyyətlərin artırılması və tələbə təşkilatlarının: THİK, Tələbə Gənclər Təşkilatı (TGT), həmçinin Tələbə Elmi Cəmiyyətinin (TEC) bu sahədəki önəmli rolunu vurğulayıb. Şahmar Rəfili bu cür fəaliyyətlərin tələbələrin inkişafına böyük təsir göstərdiyini və onların cəmiyyətə faydalı və məsuliyyətli vətəndaşlar kimi yetişməsinə imkan yaratdığını bildirib.Tədris işləri üzrə prorektor professor Akif Qasımov çıxış edərək qış imtahan sessiyası ilə bağlı məlumat verib və yüksək nəticə göstərən tələbələrin uğurlarını qeyd edib. Prorektor tələbələrin keyfiyyət göstəricilərinin ildən-ilə artığını və bunun tədrisin təkmilləşdirilməsi ilə əlaqələndiyini qeyd edib. O, universitetdə həyata keçirilən islahatların tədris prosesinə müsbət təsir göstərdiyini, tələbələrin akademik səviyyəsinin hər il yüksəldiyini vurğulayıb. Akif Qasımov AzMİU-nun təhsil mühitində müasir tədris metodlarının tətbiq edildiyini və bu metodların tələbələrin daha yüksək nəticələr əldə etməsinə şərait yaratdığını bildirib.

Rektor professor Gülçöhrə Məmmədova çıxış edərək Azərbaycanın gənclər siyasətinin önəmindən danışıb. O, gənclərin ölkənin inkişafında və gələcəyində mühüm rol oynadığını vurğulayıb və onları ölkənin hərtərəfli inkişafı üçün birləşməyə çağırıb. Rektor gəncləri indi olduğu kimi gələcəkdə də dövlət və cənab Prezidentin ətrafında sıx birləşməyə dəvət edib: "Gənclərin birliyi, həmrəyliyi və gücü Azərbaycanımızın daha da güclənməsi üçün böyük əhəmiyyət kəsb edir. Bu birləşmə, eyni zamanda, qlobal miqyasda baş verən geosiyasi və geoiqtisadi proseslər fonunda ölkəmizə qarşı yaranan təhdidlərə qarşı mühüm bir proksi qüvvədir", – deyə professor Gülçöhrə Məmmədova əlavə edib. O, gənclərin həmçinin ölkəmizin gələcək inkişafını daha da sürətləndirmək və Azərbaycanın beynəlxalq aləmdəki mövqeyini gücləndirmək üçün öz bilik və bacarıqlarını ən yaxşı şəkildə tətbiq etməyə çağırıb.Görüşdə iştirak edən tələbələr onların akademik və sosial fəaliyyətlərini yüksək qiymətləndirən və onlara gələcəkdə daha böyük uğurlar arzulayan rəhbərliyə təşəkkür ediblər və gələcəkdə daha da yüksək nəticələr göstərəcəkləri barədə optimist fikirlərini bölüşüblər.

Sonda 2024/2025-ci tədris ilinin qış imtahan sessiyasında əldə etdiyi yüksək nəticələrə, universitetin sosial-ictimai həyatında fəal iştiraka, idman növləri üzrə göstərdiyi yüksək nailiyyətlərə görə bir qrup tələbə diplomlarla mükafatlandırılıb.