İyulun 14-də I və IV ixtisas qrupları üzrə qəbul imtahanı keçiriləcək. Abituriyentlərin bir çoxu son şans olduğu üçün bir qədər psixoloji gərginlik içərisində olurlar. Bu da özlüyündə onların toplayacağı bala mənfi təsir göstərir.

Abituriyentlər II cəhddə daha yüksək nəticə göstərmək üçün nələr etməlidirlər?

Mövzu ilə bağlı təhsil məsələləri üzrə mütəxəssis Elçin Əfəndi (Əfəndiyev) AzEdu.az-a müsahibə verib.Ekspert bildirib ki, illərdir müşahidə edirik ki, böyük əksəriyyət müəyyən qədər də olsa II cəhddə balını artırıb:

“İstər I, istər II cəhd imtahanlarında abituriyentlərdə müəyyən həyəcan, psixoloji gərginlik müşahidə edilir. Bunun başlıca səbəbi isə imtahan məsuliyyətini hiss etmələridir. Daha çox həyəcan keçirənlər isə, əsasən mövzuları yaxşı qavramayanlardır. Düzdür, istisna hallarda biz yüksək bal toplayan abituriyentlərdə də bu situasiya ilə qarşılaşırıq. Bəzən 600-dən yüksək bal toplayan abituriyent təsəvvür edir ki, imtahanda qarşısına çıxan suallar tamamən fərqli, bildiyi mövzuları əhatə etməyəcək. Əlbəttə ki, II cəhd abituriyentlərə I mərhələdə buraxdıqları səhvləri aradan qaldırmaqları üçün yetərincə imkanlar verir. İmtahanlar arasındakı müddət onların həm psixolji durumunun yaxşılaşdırılmasına, həm də I cəhddə buraxdıqları mövzular üzrə səhvlərin aradan qaldırılmasına, o cümlədən keçirilən proqram mövzularının təkrarlanmasına imkan verir. Bu müddəti dəyərləndirmək isə onların öz əllərindədir. 40-42 günlük müddətdə abituriyentlər özlərini inkişaf etdirərək II cəhddə nəticələrini artıra bilirlər”.

E.Əfəndi II cəhddə uğur qazanmağın sirlərindən bəhs edib:Əlbəttə, imtahanda ən vacib məsələ vaxt bölgüsüdür. Abituriyentlər buna mütləq diqqət etməlidirlər. Onlar 3 saatın sonuna qədər sualları işləməli, imtahandan tez çıxmağa maraqlı olmamalıdırlar. Cavab kartlarına cavablar köçürülən zaman əzilməməli, korlanmamalıdır. Sürüşdürmə problemi olmaması üçün sadə karandaşla əvvəlcədən işləsələr daha yaxşıdır.

Bəzən olur ki, abituriyentlər imtahana 1-2 gün qalmış daha çox dərs oxumaq istəyirlər. Düşünürlər ki, nə qədər çox oxusalar, nəticələri o qədər yaxşı olacaq. Bu doğru yanaşma deyil. Bacardıqları qədər həm fiziki, həm də zehni cəhətdən istirahət etməyə çalışmalıdırlar. Cümə günü saat 18:00-dan sonra abituriyentlər istirahətə zaman ayırmalıdırlar. Həmin vaxtda hər hansı bir vəsaitin açılıb baxılması və yaxud oxunması doğru deyil. Belə olarsa, ikinci cəhddə nəticələrini artıra biləcəklər.Əgər dediklərimin əksi olarsa, o zaman təəssüf ki, balları I cəhddəkindən fərqlənməyəcək”.